中國熱已蔓延至下一代，歐美名人都積極培養子女學好普通話，Gucci集團行政總裁RobertPolet、高盛的前任總裁JohnThornton、最近嚟港嘅歌劇天后弗萊明，同埋剛啱都喺香港嘅商品大王羅杰斯（JimRogers），個個都係人辦。
同索羅斯一齊創立量子基金、有「商品大王」之稱嘅羅杰斯，噚日出席瑞信搞嘅午宴講座，連佢只得3歲嘅寶貝女都係內容之一。佢提到21世紀有兩大重要變化，第一係中國崛起，「19世紀屬於英國、20世紀屬於美國、21世紀將屬於中國」。仲話為個女將來做咗最好準備，包括喺中文報章上登廣告請講標準普通話嘅保母，又將屋企全部家具家電貼上中文名稱，營造個學中文嘅環境，周末就請講普通話嘅小朋友嚟屋企同囡囡玩，真係一片苦心，𠵱家寶貝女嘅普通話已相當流利。
佢笑笑口話希望個女第日搵到有為兼有錢嘅中國年輕人做老公，佢又有意舉家搬嚟亞洲一個華語城市定居，香港係其中一個選擇，上海、大連以至新加坡都考慮過，但係「香港嘅問題係空氣差」，雖然兩公婆鍾意香港，但點都要為個女着想！
晒完囡囡晒恩愛
佢提到另一個世紀大轉變係美元跌，所以佢冇幫個女喺美國開銀行戶口，反而喺歐洲就有；而佢為個女設定嘅投資組合，亦係佢鍾愛嘅商品。
羅杰斯又分享喺99年1月至02月2月3年間，環遊世界嘅相片同經歷，佢同老婆揸駕鮮黃色Ben跑周遊列國，佢仲講咗個古仔晒恩愛：喺非洲遊歷時，遇到個嚟自美國嘅女人，對方好驚訝咁問羅杰斯，佢夫婦每日坐喺架車裏面周遊，冇嗌過交？個女人話，同男友單係揸車由西岸到東岸幾日已經日嘈夜嘈！咁即係話大師唔單止投資了得，婚姻生活仲好美滿！
[email protected]