連續兩日嘅國際賽期又打完，講真小弟投注意欲真係唔大，一來人腳變化大，近績、往績參考性又唔大，二來又唔係個個禮拜打國家隊賽事，今次輸咗，都唔知幾時先有仇報。
返到歐洲聯賽，大家都比較注視英超；英超黑盤王韋斯咸，上仗終於反底擊敗布力般流浪，輸盤率終於下降，小弟其實都好欣賞呢隊波嘅主攻風格，都希望佢哋留到班，不過今次主場對米杜士堡，都讓得幾辣，都係睇多口先出手。
近7場盤路6輸
德甲方面，黑盤王終於易手，漢堡近期表現回升後，終於擺脫黑盤王污名，由多蒙特取而代之。小弟同戰友畢傑都睇過多蒙特嘅直播賽事，真係睇到火都嚟埋，進攻冇章法，防守又唔見得好；季中以為好安全唔使降班，點知輸下又一場，和下又一場，已經跌到去尾4；睇番盤路，真係嚇死人，多蒙特近7場盤路係1贏6輸，捧佢對家真係有道理。
多蒙特周五對手係比勒費爾德，講真比勒費爾德又唔係好叻，只係排尾2，不過起碼今仗有搶分動力；比軍近兩仗係輸晒盤，睇番只係作客，今次回師主場，應該有更佳發揮，話晒之前主場都贏過紐倫堡3:2，今次開平手盤，可放心捧比勒費爾德，博多蒙特繼續衰落去。
文：牽牛