球場暴力呢啲行為真係好唔要得，我求大俠對重罰班犯事者真係舉腳贊成！好似早排英足盃8強重賽，車路士作客險勝熱刺，完咗場衝落球場襲擊林柏特嘅熱刺球迷史密夫，終於得到「報應」，之後3年喺英格蘭同威爾斯舉行嘅球賽佢都唔可以入場睇，而且白鹿徑球場更加列咗佢入黑名單，終身唔可以喺主場睇愛隊比賽。講堅，抵佢死啦！
對於一般人嚟講，唔畀入場睇波真係冇乜大不了，但對史密夫嚟講，終身唔准佢踏足白鹿徑球場睇熱刺比賽，或者真係比死更難受。作為球迷，最開心梗係同班志同道合嘅朋友，結伴入場為愛隊打氣，但史密夫家陣真係諗都唔使諗嘞，以後只能夠約班朋友睇電視直播，站喺球迷角度，呢個處分真係等同被判終身監禁，呢種處罰方法真係幾毒。
不過呢單嘢都幾發人深省，尤其是對嗰啲飲咗兩杯落肚就失控，又鍾意鬧事嘅球迷，等佢哋唔好成日以為畀錢入場就大晒，想點就點，完全唔理人感受，希望今次嘅處罰可以起到警惕作用，減低類似事件發生嘅機會啦。