酒店小YY帶一位外籍朋友到馬會飲茶，碰到左丁山，經介紹後，知道呢位外籍人係法國人，名叫沙維，以前在倫敦五星酒店工作，儲夠錢就入SOAS（倫敦大學東方及非洲學院，簡稱亞非學院），主修考古學，現路經香港，小住幾日，就會去泰國考察一個月，然後返倫敦寫畢業論文。
左丁山問沙維：「你識唔識泰文呀？」沙維話：「亞非學院教語言，有啲辦法，我識講泰文㗎！」又問：「你研究泰國咩？」沙維答：「係呀，我知道曼谷法政大學（ThammasatUniversity）有獎學金畀外國學生申請，我希望明年去法政讀碩士。」
法國學生去倫敦攻讀泰國考古學，非我哋所能明白。以香港學生觀點，沙維喺倫敦五星酒店工作，憑法英兩語優勢，好吃得開，每個月攞唔少貼士，如果讀個酒店學位或商科學位，前途不愁啦。讀泰國考古喎，搵到飯食咩？
沙維話對泰國有興趣，將來點搵食，將來先至諗，大不了又去做番酒店做concierge。講起倫敦讀書，沙維話亞非學院係一間窮學校，學生窮，學校更窮，教授當然亦係窮，撐得一日多一日。
香港啲大學設施，硬件與軟件好多冇得頂，如果以香港啲官仔大學生嘅要求，到咗亞非學院，一定投訴不絕。據另一位亞非學院畢業生講，亞非學院窮到燶，佢啲教授一放假就走晒人，想搵教授在學校討論吓課程內容都唔得，一位教授同佢講：「學校冇錢請人，我叫做有一間房，但地板要自己掃，垃圾要自己掉，我如果多啲留喺間房見你哋學生，房間更亂，要自己抹多啲。更有甚者，我人工咁奀，為乜要放假時與你哋討論？」呢位畢業生為之啼笑皆非，但佢睇真吓學校環境，喺一啲後門，後牆之類嘅地方，水泥剝落，鋼筋浮現，每次攞學生證，排隊三小時，因為學校唔夠電腦，唔夠人手。呢位畢業生嘅教授onleave，到日本做研究，結果一去不回，因為教授順便搵埋工！好彩間學校歷史悠久，對亞非研究還有三斤釘，只不過係資源緊絀啫。