近年「無雙」系列叱咤遊戲界，由三國時代打到東洋武者甚至高達，仲產生唔少仿效之作，質素參差乜鬼都有，但無論如何點都叫做幫廠商賺唔少錢。𠵱家嚟到次世代年代，更天馬行空題材都可以成為遊戲內容，講嘅就係《無雙Orochi》，用三國同戰國班友Crossover打鑊勁，唔止咁仲添加咗勁多嶄新點子，如果當佢只係碗隔夜炒冷飯，咁就當堂走晒寶咯！
文：陳福榮
77名武將登場
《無雙Orochi》個古仔都算神怪到極點，話說擁有無窮力量嘅魔王遠呂智（取自大蛇「餓籮池」之日文漢字拼音），由於勁到爆廠所以貪玩將魏蜀吳三國同日本戰國呢兩個時代搞到翻天覆地，打到班君主一仆一碌失晒蹤，此外更玩埋時空融合，令到諸如曹操巧遇織田信長嘅混賬到不堪嘅情節都可以發生。為咗殺盡眼前呢班妖物，中日雙方無可奈何只能聯手，組成三人小隊誓要將大蛇一族徹底埋單。
基於光榮喺PS2都出咗N咁多隻《無雙》，所以今作就「好豪氣」咁收錄晒《真三國4》與《戰國無雙2》全部77個登場武將，你可以讚佢惠澤玩家，亦都可以話佢唔浪費、玩到盡。雖然角色擺明係善用資源，但亦追加咗同廠《封神演義》嘅索爆女角妲己作為「隱人」，想見識吓佢啲性感魅惑噴血攻擊，就要畀心機將每個勢力逐一爆機喇。
隨時換人招駁招
為咗突出角色喺能力上嘅分野，唔係單純咁劃分做來自邊個勢力，開發小組就諗到將班武將區別為力量型、速度型同技術型，再加埋戰鬥中即場換人，喺玩法上就會有多到計唔到嘅可能性出現。力量型顧名思義係「大石壓死蟹」，俾人打都會夾硬作出反擊，仲可以使用威力強大嘅必殺技，缺點就係好易俾人打死；速度型就純以快速取勝，出招快閃避亦快，仲可以空中Dash同JumpCancel似足《GuiltyGear》，當然打人就有啲似蟻咬；技術型就係大玩儲氣攻擊同反擊技，鍾意特別玩法嘅朋友不妨試吓。
至於換人嘅構思就有啲似《拳皇03》，打打吓班卒仔按L2或者R2轉另一個同伴出嚟繼續狂抽，換言之速度快但威力較低嘅人，就可以先出招牽制敵人，當確定打中咗先至換個威力無窮不過郁得慢嘅同伴，咁就有最理想嘅團體合作效果。此外出場者會慢慢補油，咁玩起嚟就點都會襟玩啲，始終唔少人都話今集嘅難度一啲都唔低嘛。
培養角色更講究
以前玩《無雙》，無論邊集個流程都走唔甩係先逐個人物爆機Unlock新嘅「隱人」，繼而不停玩返啲舊角幫佢哋升Level，同埋死儲爛儲嗰幾件傳說神兵，真係咪埋眼都識得背，悶到爆燈。𠵱家佢喺升級方面作出咗唔少改變，先講武將能力已經唔再係單靠大力取勝，一來喺過版拎到經驗值後只會提升最基本嘅數字，但對實際玩法唔會有好大影響，反而每個武將都可以學習不同嘅特技例如「馬術強化」或者「連擊回復」等，裝備咩特技上身好視乎玩家嘅個人取向。再者武將更設有專用強化道具，你用貂蟬同孫策嚟過版所得到嘅獎賞又會唔同，此舉就會令每次重玩都變得意義重大，唔再係重複又重複咁全屬意料之內。
另外，本作所引入嘅武器合成系統，縱使曾經喺其他遊戲出現過類似嘅設計，但喺《無雙》始終都係好新鮮嘅概念，事關所有上級武器都唔再係就咁執返嚟，而係要將手頭上嘅Cheap嘢互相融合變成新武器，兼且可以「加珠」幫啲武器追加炎或雷屬性等特殊效果，咁就可以令每件武器都變得更有可觀性，大家儲得開心之餘亦唔會得物無所用啦。
版本多到暈咪買錯
出《無雙》呢間廠不嬲都好識搵錢，每次都會出埋特別版、限量版同珍藏版之類掠水，到底值唔值真係好睇個人點諗。今次《Orochi》分別設有贈送角色襟章嘅特別版，同埋連同《真三國4》、《戰無2》嘅Collection版本，後者計起條數無乜點平到。另外一如以往會有來自台灣嘅行版，但佢無嗰樣整嗰樣好肉酸咁寫住「無雙蛇魔」，令唔少玩家敬而遠之，又難怪嘅不嬲行貨都唔會亂咁加句中文上封面度，𠵱家真係正宗阿茂整餅，完全爭唔落。
Profile
機種：PS2
類型：ACT
價格：$430（限定版約$700）
廠商：KOEI
人數：1-2人
