時間
01年10月10日
地點
中環皇后像廣場
人物
元斌、深田恭子
經過
元斌01年憑住韓劇《藍色生死戀》而人氣急升，被喻為韓版「木村拓哉」，香港好多師奶少女都勁冧佢，不過當年佢嚟香港當眾挖鼻嘅舉止，搞到佢喺全港fans心目中嘅型男形象徹徹底底幻滅。
01年10月，元斌同日本女星深田恭子嚟香港拍攝一部日韓合作嘅電視劇集《Friends》，香港數以十計嘅傳媒日夜追訪。記得喺10月10號當日，佢哋兩個去到中環皇后像廣場拍外景，喺排戲嗰陣，元斌唔單止冇理會偶像身份狂煲煙，而且仲當住成班香港記者面前採礦，猛咁挖鼻哥，嚇到現場班娛記當堂呆咗，事關呢啲咁失儀嘅動作，一般人都唔會當眾做，更何況係韓國人氣型男！明知現場有咁多相機對住自己，元斌都能夠咁真情流露挖鼻，真係點到你唔服！
其實唔單止係元斌，當日深田恭子一樣咁失儀，唔知係咪因為佢着嗰對鞋唔係太舒服，拍拍吓竟然除鞋捽腳趾，論礙眼程度，同元斌真係不相伯仲。
本欄逢周一至周六刊出