細個嗰陣，大人問我將來想做乜，一定係懶精乖伶俐咁答想做醫生、律師、太空人；今時今日，知道做醫生其實好辛苦兼影響心情，實習期間尤其難捱；做律師又唔係個個好環境，見過幾個律師朋友日日圍喺蚊型辦公室對住滿室的悶人文件，仲要三十幾四十度着住套西裝行嚟行去；太空人就更加唔使講，未見過過重嘅太空人。
今日如果問我有咩工想做，若果係唔使供車供樓、養妻活兒，即係搵多搵少自己夠食就得，有兩份工我覺得幾有意義，第一份係WeddingPlanner，即係幫人搞婚禮，傳統嘅就唔使用到WeddingPlanner，求其接新娘，叩頭敬茶，酒樓影相，晚飯食翅，穿金戴銀，簪花掛紅敬酒盡快飲醉然後埋單上房洞房。搵得WeddingPlanner即係代表一對新人有要求亦都有經費，準備用錢買一啲美好嘅Moments，讓日後有美好回憶。做WeddingPlanner碰到嘅都應該係開心客使開心錢，幫到人，搵到錢之餘又唔使見到黑口黑面。
另一份工係HolidayPlanner，即係有人有若干日假期，或有目的地或冇目的地，有若干經費預算然後搵HolidayPlanner提供及代定旅程，正如最近去日本放假，經友人介紹找到V小姐幫手Plan假期，結果V小姐非常細心地在市場找到最實惠兼最符合要求的食住行介紹，一切妥善安排，確係超級舒適招積超值。HolidayPlanner自己有Holiday時又可寓娛樂於工作，試吓周圍去，試到有筍嘢，第日又可以提供給別人，都幾功德無量。
又幫到人又搵到錢又快樂，確實係一份好工，肯定好過做特首，特首份工悶到暈。