時間：99年7月6日
地點：無綫清水灣電視城
人物：鄭欣宜
經過：
沈殿霞（肥姐）愛女鄭欣宜，近年因為貪靚，頻頻嗌住要纖體減肥，佢終於領悟到收身嘅重要性。記得欣宜細細個好為食，加上佢媽咪成日灌輸肥唔係罪過呢個概念畀個女，搞到佢成日係咁食，連個胃都食到大晒。
講到欣宜嘅為食樣，最經典係佢99年7月放暑假由加拿大返香港，陪媽咪錄影無綫節目《公益金屋開心Show》，坐喺觀眾席嘅欣宜百無聊賴，就食嘢解悶，佢咬住條珍寶腸，一邊睇一邊食，個樣仲食得好滋味。
當年嘅欣宜只係得12歲，身高5呎1吋，但體重已經170磅，比同齡細路女超晒標，佢嘅膽固醇當然高出正常水平，不過可能欣宜仲係細，未識響警號，依然唔肯節食。
記得肥姐當年曾經講過：「佢大個啲識得貪靚就會減肥啦，節食同食藥我怕會影響佢發育，減唔減到就要睇佢嘅意志力。」果然欣宜最終都醒覺，開始節食減肥，可惜佢嘅成績持續到一排，體形又反彈番，睇嚟佢仍需努力。
本欄逢周一至周六刊出