高清係大潮流大趨勢，唔只電視、碟機，連電視遊戲機都大玩高清，作為科技界一分子嘅電腦，又點可以唔跟呢個大方向呢！HP推出嘅套裝電腦一向緊貼新科技，今次新機m8088hk就大谷電腦高清睇片，當中重點不能不提內置HDDVD機，作為用家梗係想知電腦睇HDDVD質素如何，仲好想知道佢有咩過人之處㖭！
記者：馬靜兒
攝影：林栢鈞
主攻戲迷內置HDDVD
以前要睇高清DVD，要買近萬元一部高清碟機，呢個價錢仲未加上電視等配件，你都唔好話唔嚇人！好彩以後可以簡單方便得多，HP推出內置HDDVDROM的家庭電腦m8088hk，同系列機種一向重視MultiMedia玩法，今次更係擺明要主攻一眾電影迷，尤其係一班唔靚唔清唔睇嘅高清發燒友。現時要睇到高清質素電影，影碟主要使用HDDVD同Blu-ray兩種媒體，而作為電腦界龍頭老大微軟，暫時都傾向HDDVD一方，所以喺電腦軟件支援上比較全面，尤其係已預載《Vista》嘅m8088hk，除咗能辨認HDDVD外，採用MediaCenterPC設計，要播放HDDVD碟更係同DVD一樣咁方便。而配合高清大潮流，包埋嘅19吋LCD屏幕，亦支援微軟所推HDCP標準，雖然受顯示尺寸所限，解像度只有1,440×900，未能出到全高清畫面，不過與DVD相比，質素已經有顯著提升！
500GB硬碟可玩RAID
既然是第一部擁有HDDVDROM，擺明是一部高階的電腦，用上級數較高的配件。連硬碟都用上500GB（250GB×2），比一般機種只用160GB左右，容量大好多。500GB容量其實由兩個250GB硬碟組成，用家更可選擇RAID0或1系統。選擇RAID0，會將兩個250GB硬碟二合為一，提升讀寫速度，做咩都快好多㗎。如選擇RAID1，就可以做到備份。簡單來說，平日將自拍的短片做Edit時及執相時，資料會自動Mirror到另一個硬碟，就算突然停電Down機都不怕失去之前的心血。
跟其他品牌的家用電腦一樣，m8088hk一向以多媒體娛樂為方向，所以加埋支援DVI輸出的nVIDIAGeForce7600GT3D顯示卡，就算打3DGames都會流暢一點，唔怕會窒格。打到累，要聽歌又有7.1聲道環迴立體聲，完全是高階機的級數，可惜顯示卡方面未提供HDMI介面，未能配合HDDVD輸出全高清1080p畫質。
WLAN藍芽齊備
現時大部份Notebook都有WLAN和藍芽，家用電腦就唔係部部有。這部就有802.11b/g及藍芽2.0版本無線接駁功能，方便配合手機上網或傳輸短片、相片等。另外又有TVTuner卡，但不支援高清廣播。其他配備同樣齊備，如HDDVD外，更有多一部DVD燒錄機，有LightScribe功能，可在光碟上印上黑白圖案。
新機試碟
既然電腦有HDDVDROM，要用盡一定要狂煲HDDVD，貪場面逼真一點，色彩一點。否則，等於浪費。睇《世貿中心》等大場面的電影，因為高清畫面，世貿倒塌一刻，畫面帶來的震憾力好厲害。睇《俠影魔龍》，看到飛龍噴火，氣勢都好似特別勁。
《踢躂小企鵝》
雖然卡通片，白皚皚的雪地層次分明，映得企鵝仔更可愛。
《世貿中心》
睇住戲中的緊張場面，畫面因高清關係，拯救場面格外逼真，真的諗番起當年的恐怖場面。
《霍元甲》
講述霍元甲退隱鄉間一幕，光與影的對比甚大，膚色自然，衣衫的顏色明顯較明亮。
《俠影魔龍》
火龍噴火一刻，背景黑位較實，較少雜訊。畫面真到細膽啲都好易俾佢嚇親。
高清人有意見
Cherry：如果《瑪麗皇后》出HD-DVD，用這部機睇最好，高清畫面，宮廷服都靚好多。
Ray：明顯係Premium機，我本來打算換電腦，呢套機有埋HDDVDROM，仲用埋VistaHomePremium，萬六元，唔貴喎！
Peggy：19吋屏幕唔算好大，但電腦都算OK啦！
Candy：我鍾意睇Blu-ray多啲，碟都出得快過HDDVD。
我點睇
現時單買一部HDDVDPlayer都要八千，這部家庭電腦有500GB硬碟，又有19吋屏幕，連GraphicCard都是較強勁，賣價萬六，又不是雜嘜砌機，價錢不算貴。不過，HDDVD碟比一般DVD碟貴一倍，我對DVD的質素已很滿意，暫時無需要買這部機。
東芝HD-XA2HDDVD
配備HDMI、DolbyDigital5.1等，支援1080p。
Profile
處理器：IntelCore2Duo處理器E6400（2.13GHz）
操作系統：WindowsVistaHomePremium
記憶體：2GB
硬碟機：500GB（2×250GB）
顯示卡：nVIDIAGeForce7600GT3DPCIExpress
光碟機：HD-DVDROM/LightScribe雙層（8.5GB）16XDVDR/RW
音效：7.1聲道環迴立體聲
屏幕：19吋LCD顯示卡