冬菇亭俾你估可以有乜嘢食？勁鑊氣小炒、粥粉麵飯、茶樓早點甜品……最近行顯徑冬菇亭有間金城，橫跨3個冬菇亭、全冷氣開放，除以上所講，竟然連大酒席都玩埋；街坊報料呢度去年做過萬元豪宴！另有隱藏小炒，Menu冇、食得刁鑽兼勁好鑊氣，小小一個冬菇亭真係估佢唔到！
記者：朱崇德 攝影：譚盈傑
老死請去冬菇亭喫飯，心裏諗住會寒寒酸酸細細間；去到、錯晒！貫通3隻冬菇亭成9,000呎，全冷氣、玻璃門密封，最離譜連龍鳳大禮堂都有個，有冇咁Grand呀？老闆財哥話：「97年開業，我哋係全港最早玩冷氣冬菇亭之一！」
$9叉飯萬元酒席
隔籬枱街坊馬上搭訕：「午市特價，呢度$9碗鮮燒叉燒飯都有得食；不過要食得豪，舊年過年前我知剛擺過$13,800一圍豪門夜宴（共10圍）！」4頭大鮑、火踵海虎翅、3斤加大東星、5斤巨龍蝦做刺身、燕窩甜品壓尾！
薄利靚料街坊客
財哥解釋話：「雖然我哋做冬菇亭，不過廚房班底全部係老派酒樓做大酒宴出身，大廚更有30年經驗，所以佢哋先會食到$13,800一圍！一般酒席毛利會做到7分（70%），我哋做街坊生意最多只敢做到3-4分，貴！係食『真材實料』配大酒樓功架！」香港卧虎藏龍屋邨，又再一次估佢唔到！不過想食好嘢，未必要好貴嘅，其實呢度仲有啲Menu冇列，但大「豪」客至愛隱藏小炒王，平亦有平食啫！
荷香八寶糯米鴿$78
一般燒乳鴿雖平，不過多是冰鮮雪藏貨色，味道硬係爭啲；呢隻八寶鴿，是以新鮮乳鴿去骨，難度是鴿身皮薄，釀入蓮子、冬菇、瑤柱、蝦米、糯米等八寶後，好易逼爆；不過味道精髓卻是這個糯米飯，鴿香肉汁完全滲入其中，再以荷葉鮮包一蒸，美味鴿香全緊迫於內。
蝦亁小炒王$62
看似簡單的小炒王，家家店都有一道；特別處是個蝦亁，是新界小艇太陽鮮曬出品！鮮貨時如手指長，亁貨則起四面稜角，入口亁香無倫，比對市面一般烘焙貨色，真係冇得比，配韭菜花、腰果、菜脯、椒粒亁炒，下酒一流。
必食鑊氣菜
青芥辣燒汁吊筒$68
白到發光嘅鮮吊筒，指頭般大，以鮮蝦打成蝦膠充塞其中，隻隻肥嘟嘟到爆！以日式青芥辣及燒汁，配以中式鑊氣快炒；僅僅熟！吊筒香軟、心裏蝦膠彈牙，再配呢個惹味醬汁，一口一隻，原汁鮮美。
福果金魷銀鱔$68
杯口粗肥鱔起球，配福果（白果）、蜜豆、馬蹄猛火濕炒，配菜爽香甜蜜，鱔球則爽口甘軟；面放的金黃香粒，其實是以大荷包魷撒麵包糠酥炸的香粒，輕嚐拮口又煙韌彈牙，一金一銀、一炸一炒，食出兩種不同口感。
鐵板海參絲$88
海參做湯羮居多，以鐵板爽炒都幾少見！據知是以40條/斤的禿參，配以鮮嫩豬頸肉、洋葱快炒；豬頸肉可添海參鮮味油香，洋葱、芫荽半中半西配菜，又增其甘香惹味，再以鐵板亁燒，更是香味四溢。
睇路搵食
金城小廚（26012778）
營業時間：早晨6:30-深夜1:00
座位：300-400人
地址：沙田大圍顯徑邨熟食亭9-12號（大圍火車站803K專線小巴直達）
食神評級
讚：老派精巧小菜新做，道道特色少見又惹味，價錢真係平，須知每道都係食功夫錢，好多大酒樓都冇做得咁精緻。
彈：老闆話功夫菜多，個青芥辣燒汁吊筒每日限量、荷香八寶糯米鴿仲最好預訂，想食好嘢就係咁。
食物：★★★★★
價錢：★★★★☆
環境：★★★★☆
服務：★★★★☆