禮拜日晏晝行經大埔運頭角里酒吧區，一如所料大部份酒吧未開門。惟獨是大埔酒店旁邊有間吧，典型英式酒吧格局，老外客人卻於其中大啖燒牛肉。轉個頭又見幾個小朋友跑出跑入，食兩啖走去玩拋波仔。霎時間以為時空錯亂，突然聽到服務員叫一聲Sir/Madam，英國口音一如他手中咖啡，濃得化不開。身旁穿得像馬莎百貨模特兒的英國人Marie跟我說，It'slikehome!（這裏像我家鄉）。
記者:劉嘉蕙
攝影:何家亮
點解英式酒吧會開到嚟新界，仲走到大埔咁北？After5老闆Kenny話原來大埔圍頭村住落好多BBC（British-Born-Chinese，英國華僑）同英國人，平日行出行入講英文多過中文。老外最興落吧吹水消遣，偏偏香港嘅酒吧集中灣仔、中環一帶，所以Kenny間英式SportsBar選址大埔，等住新界區嘅老外近近哋有位落腳，仲炮製十幾款傳統英式小食，一解老外思鄉之情。
學英國人蒲吧
After5走清吧路線，謝絕猜枚骰盅，店內亦以斯文客居多，大部份老外都係教師或專業人士，新近仲有教育學院同中大嘅交換學生，氣氛熱鬧又唔雜。冇得玩骰盅，老外話圍埋齋吹水都夠過日辰，再唔係就埋去部足球機過兩招。教院靚女交換生Stella最鍾意部有齊Coldplay同Beatles嘅點唱機，話口未完就切開塊多士夾蛋擺入口，原來咁食法最英！
SundayRoast$78
據講幾百年前英國農民已流行SundayRoast，逢星期日晨早放一大塊肉進焗爐，望完彌撒後返屋企就食得。After5提供牛、豬、羊三種肉類任擇，配薯仔及5穀類餡料。After5將牛肉煮至半熟，更具嚼勁。
傳統英式小食
SteakAndKidneyPie$42
牛腰批特選牛肩及牛腰肉製成，前後煮十幾小時令牛肉變絲，加上牛油、蛋及麵粉自製鬆脆酥皮外殼。餡料食落口嚡、質感有啲似老火湯湯渣，越嗒越有味。
Chips$36
大廚話牛肉濃汁要煮超過50小時，為咗保持百分百原汁原味，佢哋用蔬菜甜味代替落糖、又以牛筋取代麵粉增加稠度，用嚟淋薯條，好味。
BangersAndMashWithGravy$58
英式腸是英倫常見小食，大廚強調店內薯茸乃新鮮薯仔打磨，唔係用粉溝出嚟，質感更Creamy。
Grilledsteaksandwichwithfriedonionandmushroom$68
三文治餡料選用安格斯牛肉，煎至腍身又保留肉汁，唔怕咬唔開咁論盡，飽香肉嫩好滋味，Marie話呢道菜最有家鄉風味。
早餐之謎
英國人食早餐並冇限時限刻，好似After5嘅英式早餐（FullMonty），68蚊一份有齊蛋、煙肉、多士、焗豆等早餐食品，由朝到晚都有捧場客，半夜12點想食都唔怕俾人話變態。英國人有幾鍾意？採訪當日鋪滿一枱小食，碟FullMonty話咁快就俾人掃晒，長跑好手阿Kirk仲話月頭玩渣打馬拉松男子半馬拉松跑第三，全靠之前嗰日食咗FullMonty！
睇路搵食
After5SportsBar（26633550）
地址:大埔運頭角里6號美楓大廈地下C舖（大埔酒店側）
營業時間:12nn-2am
座位:約50個
交通:大埔墟火車站落車，往大埔酒店方向步行
