大人細路都鍾意嘅《Keroro軍曹》，啱啱喺日本上映第二部電影版《Keroro軍曹大電影2：決戰水著兵團》，雖然香港要7月先正式上映，但我阿Net同好多御宅族、電車男一樣好心急，所以近期已經到咗電影官方網站（ http://www.keroro-movie.net/）睇睇嚟止止癮。
建立深海王國
《軍曹大電影2》官網首頁出現嘅電影宣傳海報，如果大家用滑鼠指住某幾個角色，都有唔同嘅效果出現，好似指住Tamama，佢會使出必殺技Tamama衝擊波，Giroro就會開槍，阿Net覺得𠱁到小朋友外，就連大朋友都發出會心微笑。
網站內除咗有得睇電影宣傳活動照外，仲可以喺預告片度睇到新加入嘅兩個全新角色，就係嚟自「水之惑星」嘅王子Meru同隨從Maru。佢哋擄走Keroro寄居家庭入面嘅女兒日向夏美，要佢成為最強又最溫柔嘅公主嚟建立深海王國，兼且又密謀侵略地球，Keroro兵團就要同呢對深海奇兵作戰，救夏美之餘順便拯救地球，途中當然引發唔少笑彈喇。
踢爆童年秘史
官網仲同場加映短片《Keroro回到未紅時》，踢爆Keroro鮮為人知嘅童年秘密。
唔夠喉咩？仲可以上日本便利店FamilyMart個官網（ http://www.famima.com/toy/keroro/）睇睇，入面有唔少電影紀念品賣。
電影官方網頁： http://www.keroro-movie.net/
版主：阿Net
本欄逢周一至六刊出