有時啲嘢真係同人唔同命，好似今晚德國主場對丹麥場友賽，有8名主力成員可以提早返球會報到，個理由係所屬球會嚟緊要打歐洲賽。但係冇份打歐洲賽嘅球會國腳，就一個都唔准走，要繼續「滯留」喺德國大軍。
有份退隊嘅包括拜仁3名隊員普多斯基、拿姆同舒韋恩史廸加，因為拜仁下周二喺歐聯8強首回合要作客AC，所以球員有優先待遇。不來梅嘅芬寧斯同梅廸薩卡，亦都要喺下周四出戰歐協盃，又係可以提早離隊。其餘要打歐洲賽嘅仲有車仔嘅波歷克同利華古遜嘅舒尼達，但係唔知點解阿仙奴已經喺歐聯出局，門將列文又可以走得嘅？唔係教練路維大細超吖嘛？
史浩克04前鋒古蘭爾啱啱對捷克梅開二度，唔知係咪「弗」得滯，加上史浩克早前喺歐協盃出局，所以焗住要踢今晚場友賽。但係嚟緊周六史浩克聯賽要作客大戰拜仁，咁樣似乎對前者好不利喎。多蒙特就仲慘，佢哋周五又要喺聯賽作客比勒費爾德上演護級大戰，但陣中唯一國腳後衞梅斯達都要留喺德國大軍，但好在路維話明，梅斯達最多會後備踢一陣，多蒙特心諗：「咁都冇咁傷」。