賽車運動隨住內地發展而越來越有規模，家陣唔使去外國，只要搭船過珠海就可以喺世界級嘅珠海賽車場欣賞到世界級嘅「FIAGT超級跑車錦標賽」，但更吸引嘅係，原來珠海賽車場可以俾觀眾親身參觀各頂級車隊嘅Pit（維修站）同賽道起跑區，近距離接觸林寶堅尼、法拉利、保時捷、瑪莎拉蒂、雪佛蘭及雅士頓馬田等部部過千萬、夾埋總值過億元身價嘅落場版名車，更有多項助興表演，簡直就係一個賽車嘉年華。
記者：周之達
攝影：林伯
GT1組 林寶堅尼尾段發威
FIAGT超級跑車錦標賽吸引人嘅地方係部部名車都好有親切感，皆因參賽嘅都必須係可於一般道路合法行走嘅雙門跑車，感覺上就好似一班熟朋友喺賽道上好熱血咁一較高下，睇得份外投入。今年嘅GT大賽（中國站）喺3月25日下午1時30分於珠海國際賽車場正式展開！不過先旨聲明，小記係法拉利擁躉，所以對GT2組別嘅法拉利與保時捷之爭更加着緊，賽果更令小記猶如坐上過山車般刺激！
GT2賽果暫時賣個關子，先講GT1組別，今年參加GT1嘅車輛有MaseratiMC12GT1、CorvetteC5R、LamborghiniMurcielago及AstonMartinDB9，共15隊車隊參加，經過兩小時嘅激戰，結果係由德國嘅All-Ink1.com車隊7號嘅林寶堅尼奪得。其實在比賽初段最搶眼嘅係VitaphoneRacingTeam嘅瑪莎拉蒂1號車，由賽事開始到中段一直都處於領先位置，可惜後勁不繼而被7號嘅林寶堅尼反超前，最後只跑得個第六，而亞軍及季軍則分別由PSIExperience及PKCarsport車隊奪得，兩隊所用車輛都係雪佛蘭C5R。
GT2組法拉利一雪前恥
GT2方面就係Ferrari430GT2同Porsche997GT3RSR之爭，後者喺去年嘅比利時斯柏24小時大賽中曾敗於430GT2腳下，所以今次比賽可以話係Porsche一雪前恥嘅面子之爭，而BMSScudeeriaItalia車隊嘅97號保時捷唔知點解俾佢喺賽事後段後來居上，而且一直保持領先位置執埋個冠軍，身為法拉利擁躉嘅小記當然大呼無天理，正當小記激到連飯都食唔落之際，大會宣布原來部保時捷冠軍車驗車不合格，決定取消其比賽資格，因此最後冠軍係由AFCorseMotorola嘅50號法拉利補上，亞軍係同隊嘅51號車，季軍則係ScuderlaEcosse嘅63號車，即係話今年法拉利包辦冠亞季軍！法拉利萬歲！
省鏡賽車女郎
睇靚女係男人嘅天性，今屆GT大賽亦有唔少靚靚賽車女郎畀各位養養眼，講多無謂，即刻睇睇佢哋嘅質素如何。
GT賽事似足嘉年華
去珠海睇賽車唔一定係車迷嘅專利，小記當日在場就見唔少人係一家大細一齊嚟玩，因為喺賽事舉行期間，大會安排咗維修站及起步點嘅公眾開放時間，觀眾只要買張兩百蚊人民幣嘅入場券，就可以走入維修站參觀各車隊嘅賽前工作情況，亦可以喺起跑前嘅賽道上同賽車女郎一齊合照，比起齋睇賽事，呢項安排無疑更加吸引，亦更能夠提升國民對賽車運動嘅興趣。
不過要提醒各位嘅係，呢啲高馬力輸出超級跑車嘅引擎聲絕對唔講得笑，直情大聲到能夠震痛閣下雙耳，所以入場之前最好買定對耳塞，免得損害聽覺。
世界超級跑車錦標賽係乜？
世界超級跑車錦標賽係由1997年開始主辦，參賽汽車必須是可於一般道路合法行走嘅雙門跑車，而賽事會根據不同馬力而分為GT1及GT2兩個組別，兩組同場進行比賽，而每輛車會由兩位車手輪流駕駛。GT錦標賽會喺世界各地包括英國、法國、意大利、美洲、澳洲及亞洲舉行，甚具國際代表性。
飄移王表演觀眾更High
唔好怪小記膚淺，GT賽雖然精采，但睇開《頭文字D》嘅我，硬係覺得呢場無乜幾可見到飄移場面嘅大賽好似有所欠缺，或者係主辦機構都有同感，所以今年亦同往年一樣，安排咗多場飄移表演嚟娛樂吓觀眾。
擔任今次飄移表演嘅係TYPERCLUB車隊，車隊負責人James喺兩年前集合咗一班志同道合嘅飄移高手組成一個飄移表演班底。小記當日睇見佢哋喺賽道上開到百五、六公里高速甩尾、左Fing右Fing不知幾咁有型，表演完之後在場觀眾個個都企晒起身拍爛手掌，熱烈程度比GT大賽更甚，唔少人仲喺表演後搵班飄移車手嚟影相留念㖭。
