陳法拉最近緋聞不絕，人氣急升，早前更被傳「姣媾」胡杏兒的緋聞男友黃宗澤。正所謂不是寃家不聚頭，雖然爭仔是非傳得鬧哄哄，但雙姝也不避嫌孖住上搵錢，昨日兩人便雙雙為金至尊上水分店擔任剪綵嘉賓，同樣以低胸裝亮相騷身材，鬥搶風頭。
街坊力撐夠索
兩人各獲大會安排佩戴總值逾50萬港元的鑽飾，駁上一頭長髮的杏兒增添不少女人味，除了排場比法拉勝一籌外，不少途人也只認得杏兒，還有大批街坊勁讚她真人靚過上鏡。
情敵碰頭，理應份外眼紅，昨日杏兒和法拉現身時卻笑容滿面，毫不尷尬，杏兒還大讚法拉漂亮，她說：「冇尷尬喎，我哋嚟緊仲會一齊出席一個活動，好似造就咗我哋咁（指爭仔傳聞），多咗工作，有機會三人（指黃宗澤和陳法拉）合作搵錢都唔會介意。」對於自己遠比法拉受歡迎，她就說：「大家都靚，唔一定要比較。」
法拉則表示很開心今次可以跟杏兒合作，她又謂早前在電視城碰頭時，杏兒還主動安慰她。法拉說：「嗰陣我好多緋聞，佢勸我唔好唔開心，做做吓就會慣，當時令我好感動。」
採訪：卓寶花
攝影：陳偉權
