AC米蘭、拜仁慕尼黑、華倫西亞正面對困局，唔單止要為下星期嘅歐聯而戰，仲要為下屆歐聯參賽席位而戰，到底禮拜六聯賽留力好定唔留力好？箭在弦上，３強冇得揀。 文：藍鑽石
-AC冇留力空間-
羅馬主場對AC米蘭，喺香港時間愚人節凌晨上演，AC中場施多夫就喺愚人節生日，唔知到時佢整蠱人定俾對手整蠱。計我話，安察洛堤仲未炒得先至係大整蠱，「肥安」一日在位，AC都冇邊場好波。再睇AC今季踢歐聯前嘅聯賽周不時失分，想贏羅馬報首循環一戰之仇，難矣。
雖然兩隊波都有歐聯後顧，但羅馬個2哥位幾穩，絕對有失分空間；排第5嘅AC就冇咁幸福，本來咬住前面嘅拉素唔放，點知人哋起勢贏波上埋第3，家陣要將假想敵變為跌到第4嘅巴勒莫。AC承受唔到錯過下屆歐聯嘅後果，所以明明想留力下星期二鬥拜仁，但呢場鬥羅馬又要搶分，點算好？
想贏羅馬有難度
最慘係主將卡卡去完瑞典踢兩場國際賽，幾個意大利國腳踢完對蘇格蘭嗰場又未必唞夠，後衞邦利拿今場仲停賽㖭，想搶分，都仲係要靠晒冇份踢歐聯嘅「大哨」朗拿度咯。
既然羅馬下個禮拜三要惡鬥曼聯，呢場鬥AC又唔係一定要贏，睇住嚟食，啱晒佢哋穩守快速突擊嗰家波。首循環射垮AC米蘭嘅「王子」托廸，狀態當然好，但柏路達不遑多讓，上場對費倫天拿踢得好活躍，仲差啲入埋奠勝。再計埋羅馬主場聯賽9連勝，唔想贏你，都唔會輸畀你啫。
今輪焦點大戰
羅馬vsAC米蘭
開賽時間：周日（01/04）2:30am
直播：有線62台
-拜仁貴人「照住」-
如果你問拜仁慕尼黑教練希斯菲特，呢刻最錫邊個，答案應該唔係佢老婆，而係德國國家隊教練路維。我唔係指兩個有斷袖之癖，而係踢完上個禮拜六對捷克後，路維放8件主將返球會，包括拜仁嘅普多斯基、拿姆同埋舒韋恩史廸加。嘩，咁關照，唔錫佢錫邊個？
前日，拜仁已經有三分二球員返歸，希斯菲特「嗱嗱臨」加操，特別加強體能訓練。佢咁緊張，無非因為禮拜六喺德甲對完史浩克04，下周中就到歐聯硬撼AC米蘭，兩場波決定今季命運。拜仁如果贏到史浩克04，唔單止保留一絲爭標希望，仲有機會上番前3，起碼叫保住下屆歐聯參賽資格嘅位置。
史浩克04上仗擊敗史特加，叫做止跌，但路維冇關照，古蘭爾要踢丹麥場友賽，加埋巴西中場連干繼續停賽，拜仁有機可乘嘞。
今輪焦點大戰
拜仁慕尼黑vs史浩克04
開賽時間：周六（31/03）9:30pm
直播：有線62台
-華倫進退兩難-
呢幾日華倫西亞個隊名不斷見報，全因陣中西班牙國腳摩連廸斯、韋拿喺上輪國際賽對丹麥踢到曉飛。雙箭頭咁弗，照睇禮拜六主場對愛斯賓奴實食冇黐牙。
呢兩隊波嘅共通點，係喺歐洲賽分別殺入8強，西甲球隊想再壟斷兩大盃賽，隨時就靠呢兩隊。講到聯賽，計吓數排緊第4嘅華倫西亞只係落後榜首雙雄（巴塞隆拿、西維爾）6分，冇話冇後上餐士，但轉個頭講又只係多第5位嘅薩拉戈薩1分，一下唔覺意連下屆歐聯資格都冇埋。留唔留力下個禮拜三作客車路士場波好？
好彩，愛斯賓奴喺聯賽高不成低不就，力爭上游難，但降班又未到佢，擺明重視下星期四對賓菲加場歐協盃，今次作客華倫，全隊最有鬥心可能係被華倫棄用後，首次返米斯達拉球場倒戈嘅魯費廸。
今輪焦點大戰
華倫西亞vs愛斯賓奴
開賽時間：周日（01/04）2:00am
直播：有線61台