苗僑偉（三哥）04年復出幫無綫拍劇集《學警雄心》後，48歲嘅佢榮升師奶殺手，不過以三哥嘅魅力，除咗吸引一眾師奶fans外，原來連後生女都對佢嗒晒糖，好似近日佢就被指喺寧波拍《歲月風雲》時搭上同佢年齡相差成24年嘅無綫高層梁家樹愛女梁靖琪（Toby)，二人出雙入對，仲俾周刊影到十指緊扣深宵漫步，平時成日拉手拉腳，同熱戀情侶冇乜嘢分別，三哥似背住老婆戚美珍同Toby搞忘年戀。
「家人震驚」
Toby噚日接受商台電話訪問否認佢哋拍拖，佢話：「其實我同三哥係好close，所以得閒無事都會拖吓手，好care大家，過馬路都會搭膊頭、拖手咁，佢就好似我契爸爸咁，我哋未上契，但一見面都會叫爹哋，佢又會叫我阿女。」
提到屋企人對呢件事嘅感覺，Toby話：「家人初時有啲shock（震驚），但都冇乜嘢，知道我當佢係爸爸。我哋其實好快已經投入咗套劇，佢係我爹哋，好錫我，有時我一家人都會同三哥三嫂一齊食飯。」佢仲話已經聯絡三哥三嫂，三嫂反過嚟安慰佢㖭，Toby話：「其實我諗我始終係鬼妹仔性格，我諗我會避忌吓。」
噚日喺廣州公幹嘅苗僑偉，同馮仁昭傾長途電話時就解釋：「我哋成家同Toby一家人好熟，我拖住佢，同爸爸拖住個女出街有乜分別？我都知啲周刊炒作新聞，但唔好太過份囉。」
