昨日有報道指陶大宇與妻子黃慧寶（阿寶）離婚，阿寶更大爆離婚導火線是第三者郭羨妮介入。傳與郭羨妮合演《學警出更2》一啜撻着的大宇，昨日拍攝新劇外景時，因心情欠佳頻頻NG，已除下婚戒的他直認三周前正式離婚，揚言一人做事一人當，但他懶理前妻爆料，卻死護新歡郭羨妮，指對方受他連累。
陶大宇於兩年多前的結婚四周年紀念日曾接受本報專訪，當時他說：「我愛我老婆㗎，唔愛都唔維繫到咁多年。」沒想到近年與緋聞絕緣的他，竟在毫無先兆下被爆結束七年婚姻，原因更是因第三者郭羨妮介入，實在令人始料不及。
前妻保風度
「唔想唱衰佢哋」
昨日有周刊報道指43歲的大宇去年與郭羨妮因合演劇集《學警出更2》撻着，拍激吻戲啜出愛火花。32歲的郭羨妮因先後與已婚的殼王陳國強和馬德鐘扯上關係，遭劇組孤立，加上愛犬去世，令愛狗之人大宇對她由憐生愛。坦言已跟大宇辦妥離婚的阿寶，在訪問中直指郭羨妮是第三者，形容「俾一個個底咁花嘅女人破壞家庭」。
昨日阿寶接受本報電話訪問時仍然情緒低落，並透露離婚是她主動提出，她說：「其實大宇唔想離婚。」問她為何如此決絕，她說：「我覺得做咗開心啲，我哋已經分開咗幾個月，不過手續正式搞掂係上個禮拜嘅事。」問阿寶如何得知郭羨妮是第三者，她說：「總之有啲嘢，詳情我唔想講，唔想唱衰佢哋。」她得悉大宇不認離婚是因郭羨妮介入後，只說：「唔認由得佢，我唔想再講。」
至於大宇昨日仍須拍攝新劇《和味濃情》，他下午抵達將軍澳一壽司店拍外景時，手上已沒戴婚戒，現場見他兩眼布滿紅筋，甚為憔悴，與駱應鈞拍對手戲時更NG逾30次，令他頗為𤷪𤺧。約6時收工後，大宇向在場記者說：「我控制唔到人哋支筆點寫，時間可以證明。但我要同郭羨妮講聲唔好意思，連累咗佢。」
記者昨日曾致電大宇，他聞悉阿寶指郭羨妮是第三者後說：「佢有佢講，我就話唔係，我控制唔到，佢話事啦，佢點講我冇辦法，但我唔信佢咁講。」對於離婚一事，大宇說：「我係離咗婚，但點解要離婚唔需要回應，呢啲係我私人事，講嚟冇意思，大家唔好亂估。仲有我要強調，係完全唔關佢（郭羨妮）事，係我陶大宇自己嘅問題，咁講對佢好唔公平，好寃枉。一人做事一人當，冇牽涉第三者。」
稱和平分手
「離離合合好閒」
大宇承認已離婚三星期，問他與郭羨妮有否發展機會？他說：「我呢頭離婚，嗰頭你問咁嘅嘢？我𠵱家乜都唔諗，人都要活下去，畀啲心機做嘢。」他又稱會繼續照顧阿寶，並透露近日已搬到兄長家中暫住。
此外，大宇昨日接受商台DJ查小欣訪問時說：「同前妻係和平分手，離離合合好閒啫，我冇事，太太都冇事。」問大宇對郭羨妮有何感覺，他說：「佢係好同事、好對手，我性格係大癲大肺，只希望件事可以平靜。」主持指他以後拍戲應避忌一點，他說：「仲避？唔避忌啦，𠵱家單身喎。」問大宇會否再拍拖，他說：「現階段拍拖嘅事好難講。」
採訪：林妃、藍文浩、楊潔雯
攝影：娛樂突發組
