禮拜六英超「早場」利物浦迎戰阿仙奴，宿敵交鋒兼開飯時間踢，誠意推介。睇聯賽榜形勢，阿仙奴少賽1場仍穩守第3，「4哥」利物浦多保頓7分，照睇呢兩個下屆歐聯外圍賽位都無走雞啩？不過，咪當呢場係例行公事，話晒兵工廠首循環聯賽數紅軍3:0，跟住喺年頭4日內兩個盃賽贏完3:1再贏6:3，數得咁過癮吖嗱，紅軍唔理下個禮拜二歐聯對燕豪芬，都要同你死過。
近期兵工廠嘅消息全部都好負面，首先係英聯盃決賽同車路士衝突單嘢，被罰款10萬鎊（約152萬港元），小事；但基拔圖施華開晒口話有興趣加盟祖雲達斯，而法比加斯話隊波今季乜錦標都無，覺得好失敗，好down喎。照咁睇，紅軍有機會趁對手士氣低而贏番鋪。
今輪焦點大戰
利物浦vs阿仙奴
開賽時間：周六（31/03）7:45pm
直播：有線63台