黃耀明和周迅昨日在銅鑼灣宣傳，談到劉以達透露曾公開表示不滿明哥乃陳海琪教唆，黃耀明指劉以達是個「長唔大嘅細路仔」，欠缺定力，雖然如此，但就不排除將來仍有合作機會。
周迅為電影《明明》跟黃耀明合唱廣東版主題曲《流浪者之歌》，該曲MV昨日在銅鑼灣時代廣場首播，周迅身穿價值$25,500Loewe紅色斗蓬，和明哥齊齊現身，並主持亮燈儀式。她在MV中染了一頭紅髮和穿上膠衣，與明哥扮演迷離特務。明哥大爆錄音期間迫周迅飲酒，讓她放鬆心情，周迅以普通話說：「廣東話的心、生跟新這些音都很難分。」問她可是飲得之人？她說：「唔算飲得，但就希望再跟明哥合作。」
「唔好糾纏落去」
劉以達近日透露之前公開不滿黃耀明，是陳海琪教唆，對此明哥說：「都過咗去啦，過咗去就唔好再糾纏，佢𠵱家都有新經理人同佢開始新工作，如果以前比較混亂，𠵱家都會清晰啲。佢個電話好難打，我喺公開場合撞到佢，都叫佢有需要就隨時搵我。」
被問到與劉以達合作多年，會否覺得對方性格容易受人唆擺？明哥說：「佢從來係一個長唔大嘅細路仔，佢自己有時唔係好有定力。」對於林海峰表示軟硬與達明之間的合作已畫上句號，明哥說：「舊年都話係句號，再有嘢發生都係新計劃，𠵱家冇任何計劃，暫時唔會合作。我哋（指達明）都分開好幾次，唔會話永遠，將來都有合作嘅可能。」
採訪：卓美娟
攝影：葉君海
