特首「競選」結束，一如所料，絕對冇冷門爆，曾蔭權大勝，得選委會委員選票共六百四十九張，比梁家傑嘅一百二十三票，多成五倍幾，用鬼子佬選舉語言講，曾先生得到塌方式（landslide）勝利，好值得高興。不過鬼佬大報《金融時報》故意攞景，故意話呢場塌方式大勝係一個「橡皮圖章選委會」嘅投票結果。邊個勝利者想人哋話佢參加「橡皮圖章選舉」㗎？唔怪得曾先生喺選舉前已一再聲明，要在以後五年徹底解決普選問題，喺選舉上要「玩一鋪勁」嘅！你話三月二十五日嘅選舉係選民一人一票投票嘅話，曾先生得八十幾萬票，梁家傑得十零萬票（根據民望調查嘅結果），曾先生當特首就威到盡啦，《金融時報》邊度敢單打佢！曾先生，希望你能夠為二○一二年特首選舉打好普選基礎！
講馬唔慌中嘅鄭大班事先對選票結果預測，百分之一百準確，佢老早私底下估計曾先生會得六百五十票，𠵱家真係有六百四十九票，如果唔係有一位選委張小傑（中國海外董事）過咗身，曾先生真係有六百五十票㗎。
數飛數得咁準，冇用吖，又冇錢收嘅，不如講股票，鄭大班三年前講過買東方海外，舊年講中人壽，今年年初講港機工程（44），全部升到笑，呢日鄭大班話益街坊，講多一隻，就係「碧桂園」，呢隻係新股，四叔李兆基係順德人，老早話大力捧場。等到新股上市，申請番一兩手啦，睇吓有冇運抽中。問鄭大班：「咁你咪好發？」鄭大班反問：「你上星期講中大校友會盃，畀四隻馬中晒四連環，你發唔發吖？」哎吔，上星期日掛住應酬，喺沙圈周圍握手，竟然忘記了買飛，後來睇見三重彩有三千二百幾，為之心痛。鄭大班話：「咪係囉，淨係識得講而唔下大注，發鬼達咩！」
買股票都要識得及時「骨水」，先至真係賺錢，睇吓曾淵滄教授（三月二十六日）講電盈一路升之時，佢唔獲利回吐，結果遺憾到而家，只能怪自己，大家要學習教授呢個教訓。八號仔今日派成績表，喺選舉日穿粉紅色恤衫嘅李澤楷聽講唔會到場，留番開股東大會先至同股東傾。