劉嘉玲呢輪因為同台灣首富郭台銘傳緋聞，成為中港台風頭人物，噚日《新浪網》轉載《東方早報》報道，話郭生喺上海湖南路附近買咗一間價值4,000萬人民幣嘅獨立洋房送畀嘉玲，呢間豪宅外牆有兩層樓高，用花崗岩造，聽講間屋係由一個台灣商人買咗，唔知係咪因為咁就以為係郭台銘呢？
不過馮仁昭搵人去呢間別墅了解過，間屋座落喺高郵路，𠵱家由一個來自台灣嘅一家四口家庭住緊，聽啲鄰居講，佢哋六、七年前用200萬美金（約1,562萬港元）買咗，一直住到𠵱家，亦冇聽過話嘉玲買咗，不過女主人從事藝術界，平日有唔少名人喺呢度出入。噚日嘉玲經理人公司澤東否認咗送屋嘅報道。
梁母斥雜誌作料
另外，噚日有雜誌報道梁朝偉媽咪上星期去沙田探個女，點知俾記者截住問佢知唔知個仔係咪同嘉玲分咗手，梁媽媽話：「唔好再問啦！我哋已經好慘！」佢又話好耐冇見嘉玲。據馮仁昭所知，梁媽媽同嘉玲關係唔錯，應該唔會咁講嘢，噚日梁媽媽果然透過澤東回應話：「我冇同雜誌講過呢啲嘢，佢哋亂寫嘅！」面對傳言，劉嘉玲噚日喺電話中長歎一聲，以普通話回應話：「唉！我今年沖太歲，凡事應低調，但事與願違，房子的事與我無關！」
