淡出娛樂圈多年的武打女星李賽鳳，01年嫁給香港知名玩具商羅氏家族太子爺羅啓仁後，放棄安逸的少奶奶生活，繼續東奔西跑推動舞蹈藝術。小時候，家境貧困的李賽鳳，獲舞蹈老師免費教學，今日，她辦舞蹈學校設獎學金幫助環境欠佳學生，以報答當年老師恩情；在她而言，名牌物質絕非心中所想，有意義的人生，才是她畢生最渴望得到。 撰文：戴彩煥
婚後與丈夫定居美國的李賽鳳，現時除在香港開設「李賽鳳舞藝坊」外，更為丈夫的羅氏國際演藝公司擔任藝術總監和節目製作人，今年五月在香港文化中心公演的動作音樂劇《兵馬俑》，便是夫婦二人心血力作。
追求心靈富庶
日前李賽鳳接受本報專訪，問她嫁入豪門後何不好好享福，她笑說：「自己唔係少奶奶命，叫我買幾千蚊個手袋我都唔捨得，我個人比較實在，唔追求名牌，物質唔係我想追求嘅嘢，反而心靈上有意義先至係自己想追求，所以拍戲拍到後來，唔係好有心機再拍落去，練到一身好舞功，嘥喺冇乜意義嘅電影度，不如搵番啲有意義嘅嘢做，於是開辦間舞蹈學校。」
93年與李賽鳳一起拍檔辦學的，原來還有現時在無綫當藝員的康華，李賽鳳說：「康華喺演藝學院未畢業時我已經識佢，我問佢畢業後想唔想做老師，因為我冇時間做老師，不如我主外佢主內，佢話好，於是佢畢業後同佢搞學校，但教咗一段時間佢就話唔教，想入行，我即刻愕然，咁點算？因為當時學校淨係得康華一個老師，我冇諗過佢會唔做！當陣時我係唔開心㗎，但我同佢冇反面，人各有志，佢要選美，要入行，我祝福佢，冇所謂，最緊要自己有個實力喺度，邊個嚟邊個走都唔會影響到你，呢件事提醒咗自己唔可以單單依靠一個人，如果個個老師教教吓走，間學校咪唔使搞？所以自己即刻考番個老師牌。」
李賽鳳辦學初時也有虧本，幾年後才收支平衡，到現在辦學14年，她已擁有10多間分校，為鼓勵學生，她還增設獎學金，幫助一些有天份而家庭環境欠佳的學生，李賽鳳說：「我細個學鋼琴學跳舞，屋企環境比較困難，當時有啲老師好好，唔收我學費，我就諗，將來我大個咗有能力幫到啲好學生嘅話，何樂而不為？可能以前老師咁對我，我大個咗用番咁嘅態度去對學生啦。」
「星爺冇得頂」
訪問中，李賽鳳還提到當年首部武打劇集《醉拳王無忌》拍檔吳剛，以及從未合作過的周星馳，她笑說：「吳剛當年成日要打大赤肋，一埋位就搽油，唔知係咪搽得太多，搞到個身起晒粒粒，我同佢合作，都成日揩佢好多油㗎！講到周星馳，佢做緊《430穿梭機》時，弗烈介紹佢畀我識，話呢個人癲㗎，好鍾意跳霹靂舞，成日整到個額頭損晒！初時我唔知周星馳係邊個，但慢慢睇佢啲作品，覺得幾有意思，佢啲喜劇真係冇得頂！」
攝影：陳順禎
場地：CityGolf
本欄逢周二刊出
