歐國盃外圍賽踢埋今輪，就要等到6月先再舉行，呢個階段嘅排名，對日後出線形勢都好重要。
塞爾維亞上場作客居然輸畀哈薩克，唔少捧場客都損手；今晚佢哋返主場迎戰葡萄牙，有冇機會反彈呢？塞爾維亞主場3戰全勝，不過只係贏過阿塞拜疆、比利時同阿美尼亞呢啲實力較弱隊伍，欠缺說服力。葡萄牙上周主場雖清風送爽贈比利時4蛋，但佢哋亦只限喺主場發威，作客兩戰1和1負，都唔係幾信得過。家吓大家同得10分，呢場和波對雙方都冇壞，和氣收場都幾好！
每組都有魚腩球隊存在，E組都唔例外。安道爾4戰全敗之餘，只攻入1球，失咗19球！平均每場失4.75球；幾乎可大膽講，邊隊對住佢哋都可以拎3分走。英格蘭向來「雷聲大雨點小」，上場作客只能以0:0悶和以色列，出線形勢告急；而領隊麥卡倫帥位亦岌岌可危。今場喺中立場巴塞隆拿市遇上魚腩安道爾，可估埋英軍可大數對手！信多英格蘭一次咁多，揀「客勝」。
阿鵬
有線球彩台主持
電郵：[email protected]