貿易T每年招呼唔少海外來客，過往請啲客人食餐飯，傾吓生意就算，現在唔得咯，歐美客戶例牌有一個行程表，請貿易T安排，就係第一天在香港見面談生意吃晚飯，第二天遊澳門，第三天遊深圳東莞，第四天離港。搞到貿易T疲於奔命。外國人客有此要求，是可以理解的，因為澳門賭場收益已超過拉斯維加斯大街（TheStrip），全世界都知，外國人來港，個個想去澳門睇吓啲賭場點靚法，點解會超越拉斯維加斯。到深圳更加需要啦，IBM嘅環球採購頭頭都自紐約搬去深圳辦公，深圳成為Chinasourcingcentre，唔去行吓點得。
貿易T去過澳門十幾次之後，識咗一啲酒店高層，發覺澳門酒店唔係咁多客啫噃。將來全部酒店起好晒之後，有近六萬間房，多過香港㖭，到時啲住客從哪裏來？酒店高層G同貿易T講：「我哋間酒店已經收得平，一千蚊一晚啫，但來自大陸嘅賭客/遊客，捨得喺賭枱上輸幾千銀以至一萬銀，但點都唔肯住一晚酒店，賭通宵之後就走返珠海啲賓館瞓覺，一年有千零萬遊客又點吖，唔少係即日來回嘅。」
貿易T話永利附近，一啲項目已經拖慢，費事咁快起好，一於等吓先。另外，去得澳門多，貿易T變成過大海渡輪常客，佢認為渡輪嘅服務態度五十年不變，乘客成日俾人鬧，都唔知為乜？如果澳門要吸引大量外國遊客到澳門開會、參加展覽，渡輪服務唔該大幅度改善。
將來有咁多酒店房間，冇大量MICE遊客唔掂，呢啲遊客除咗開會之外，一定會去吓賭場，睇吓騷，參與娛樂節目，澳門成為賭場之都，超越拉斯維加斯，比較容易，但要利用賭場優勢，進一步成為會議展覽之都，媲美拉斯維加斯，仲有一條好長嘅道路要走，貿易T認為目前未得住，佢就好希望港珠澳大橋快啲起好，等佢可以揸車去澳門，直達酒店停車場，唔使受渡輪氣！