乜嘢係櫻蝦?用櫻花瓣飼養嘅蝦？還是「嬰」蝦，意指BB仔蝦？當然冇咁膚淺啦！每年3、4月，呢個時間就係佢當造季節，日本人更視為國寶級健康食材，但香港日本一樣，都唔係咁易食到！
記者︰王俊榮
攝影︰陳陶鈞，陳偉強
櫻花開櫻蝦當造
想喺香港賞櫻花？難！想喺香港嚐櫻蝦亦非易事！每年3、4月日本櫻花盛開初春季節，就係櫻蝦當造季節，一年裏頭只得呢兩個月時間先食到；香港君悅酒店鹿悅日本餐廳主廚伊藤浩幸，就以此特色食材創作出全新春日菜式。
咪睇櫻蝦細似蝦毛，其實營養價值非常高，含豐富磷、蛋白質，及比牛奶高6倍的鈣，絕對是女人、小孩及老人的營養恩物，所以日本人視之為國寶級健康食材，據知就算日本本土，都唔係間間日本料理店可以食到，香港更屬罕見。至於櫻蝦名稱由來，據知此蝦產於日本靜岡，蝦身微粉紅而呈透明，在海中飄浮時，會發出粉紅的螢光，如以潛水觀看，簡直有如櫻花散落之美，加上每年當造時間，又同櫻花盛開時間相若，因而得名。
酥炸櫻蝦天婦羅$85
以一堆櫻蝦黏粉，包裹着另一隻九州蝦之上，再炸成天婦羅︰「要將櫻蝦做到可以黏住九州蝦，落粉要適中；而且做天婦羅最講求掌握炸油時間，時間太短，九州蝦會熟唔透；相反炸得太耐，又會將細小的櫻蝦炸燶，呢層就最考師傅功力。」入口賣相相當得意，蝦中有蝦，一口咬落油而不膩，周邊櫻蝦香脆可口，中間九州蝦就蝦味濃，雙重享受。
拼個1蚊銀埋去，真係同隻櫻蝦差唔多大，估唔到咁營養豐富。
金目鯛櫻葉壽司$90
壽司飯裏面點解有啲黑色一粒粒？師傅話唔係污糟嘢！只係加入冬菇、椎山同埋鹽醃昆布加強口感；面放肥美金目鯛魚生，再以象徵春天的櫻葉包裹。成件放入口，櫻葉散發一陣梅子清香，魚生肉質細滑，特製壽司飯又帶出點點鹹，原汁原味就咁食就最好不過。
食材解碼
日本人喜歡以櫻葉包裹米粿類食品，情形有如中國人用荷葉、竹葉一樣，食物因而味帶清香。
木之芽燒三文魚$180
鬼佬煮菜喜歡香草調味！日本料理常用的春季調味草葉，則有「木之芽」；先將木之芽切碎，撒勻於鱒魚上燒至金黃香脆；未入口已經聞到一陣陣肉香！魚肉較平時食開的三文魚厚身、實淨，慢慢嗒仲可品味其細滑。
冷製海帶蓮芋$80
以日本甜醋醬油，冷浸已經去皮切條的蓮芋絲，加上日本德島出產的海帶，溝成一碗漂亮的冷吃前菜，蓮芋同海帶口感好，咬落「索索聲」；甜醋清香又唔太酸，𠵱家天氣下有醒胃作用，作前菜就最啱。
食神評級﹝5粒★為滿分﹞
價錢★★☆☆☆
食物★★★★★
服務★★★★★
裝修★★★☆☆
讚︰
路線高檔，環境清優，食材亦新鮮，感覺幾有誠意！
彈︰
始終係高級酒店，價錢頗高，普羅市民會食得幾肉赤。
睇路搵食
鹿悅日本餐廳（Kaetsu）
地址：香港港灣道1號君悅酒店M樓
電話：25847088
營業時間︰12:00nn-2:30pm；6:30pm-10:30pm