周三足智彩開咗歐國外加友賽共22場賽事，又係時候度一度早飛，揀番條心水過關。睇勻全日得3場開「讓球」，其餘19場全開「讓球主客和」，係咪咁多場強弱懸殊對碰先？老友小心捉蟲呀！
英格蘭對安道爾開[-3]，係人都知英軍呢期唔識入波，個「客勝」得嗰1.72倍，又係嗰句「情意結」，臨場預計會落飛，但抵唔抵買就自己諗。個人就建議買個1.82倍「細」（4.5球）仲穩陣，咪當安道爾唔識踢波先得㗎，守你兩嘢遲遲未失，盞驚餐懵。
丹麥「客勝」恰德國弱陣
反而另外兩場，羅馬尼亞同威爾斯開嘅[-3]就唔同，因為兩隊都會喺主場，對頂級魚腩盧森堡同聖馬力諾，計落1.72倍同1.62倍「主勝」，點都抵買過英格蘭啩。仲有場友賽大家要留意，德國講到明會收起上場8件正選，仲話畀啲新仔試吓落場，主場對丹麥開[-1]？球迷呢場識買「客勝」喇啩。
文：畢傑