「仲話50年不變，5年就變啦！」兩年多前單挑政府、一度癱瘓領匯上巿的盧少蘭入稟法院，體現了司法公平公正原則；卻因阻人發達，被冠上「惡婆婆」之名。今時今日領匯股價節節上升，但旗下小商戶抗議大幅加租，酒樓投訴不獲續約，當年對盧婆婆指手畫腳的街巿人，無不感慨錯信政府。盧婆婆說，針拮到肉「𠵱家呢班人就瞓醒喇！」到今日歸於平淡，她聲言交棒給下一代，未來會專注爭取全民退休保障。 記者：張嘉雯
「搞gag」可能是盧少蘭的強項。當日心口有個勇字跑去興訟，只因「幾大就幾大，燒賣就燒賣」，懲戒董建華要「敲佢個老虎頭」；孫公賣領匯等同「嫁錯老公生錯仔」；小圈子選舉猶如「床底種葱」；曾蔭權工作呢……「做一日和尚，要念一日經」──無實際行動。句句清脆利落，小巿民聽得痛快。
自言人生最激之作
當年政府千算萬算，未有考慮到訴訟風險，膽粗粗推領匯上巿，居住葵盛西村的盧少蘭覺得「唔對路」，於是「諗計仔」，阻政府賣家產，掀起這場世紀官司，她自言是人生最激之作，「初初諗住咁多人咪一齊去囉，收尾啲人又縮沙，我自己幾大就幾大，燒賣就燒賣囉，驚都無辦法，都洗濕咗個頭囉，死咪死，我係為人民利益㗎嘛。」
身為家中老大的她，覺得自己「都唔係咁惡」，身在內地的四個弟弟非常愛護她，可是從電視新聞知道她成為新聞人物也非常震驚，「個個嚇到屎忽都無肉。細佬同我講：『家姐今次實拉去坐監喇！』另一個細佬嚟探我，一齊飲茶嗰時聽到有人問起，佢唔認我㖭。」
類似的場面在往後的大半年不斷上演，「有鄉里打嚟，話『小心喎你，盧少蘭』。有啲三九唔識七，喺街度見到我，『咦！你唔係領匯嗰個盧少蘭？』我咪話『講乜呀你，唓，你認錯人喇！』」
年近70的盧婆婆小時住南海農村，原名盧肥女，但身形「瘦蜢蜢」，到14歲唸小一才自己改名為少蘭。當年她跟弟弟同班，學費每個學期三個六銀錢，唸到六年班時已年過20，半工半讀才完成學業，「阿媽都唔識字，老竇幾好㗎，話識字起碼可以知街名，搵到份工，初初我都讀得幾叻嘅，後尾顧生產，做嘢做到魂飛魄散，就無讀囉。」
重大任務「等牛屙尿」
當年仍是少女的盧少蘭，平日除了學習中文、算術，還要寫大字，閒時揹弟弟四處去，要做家務又要落田，最重大的任務就是「等牛屙尿」，用作肥料，性急的盧婆婆為了極速完成工作，就想出「計仔」，「攞啲水淋牛背，黃牛一個冷震就屙出大泡尿，（咁麻煩仲乜唔自己屙呢？）自己屙邊夠用㗎！」
盧的丈夫是香港人，愛打麻雀、開車，但「周身刀無張利」，「嗰時佢住隔籬村，佢返鄉下嘅時候識佢嘅，覺得佢幾忠誠、老實。」婚後她申請來港，結果十年後、即84年才成功，最初在酒樓洗碗，賺3,000多元一個月，閒時愛煲電視、看報紙，住在荃灣德華街的套房。
「嗰度有一張枱、一個櫃，每月開支1,200元，唔使屈喺家婆間屋，嗰時最開心，因為有銀搵，身體又好，做嘢好搏命，最收尾有6,300蚊，仲有小賬，不過太辛苦，搵到都無命享。」
盧婆婆平時聲大大，但原來貧血，工作時多多碗碟「照拎可也」，「點知有次唔小心仆親，𠝹到塊面，老闆鬧我，話我大陸人，做又36，唔做又36。」強悍的盧婆婆即時反駁刻薄老闆，「𠵱家我做嘢唧，你講乜大陸人唧，你咪炒我囉！」2000年她正式上樓，搬到葵盛西村，體弱多病的丈夫在2001年過身，臨終前足足花了十萬元醫病。
「唔夠5年就開始變」
回歸十年，她認為特區政府愈來愈偏幫商家，「佢初初都幾好，等我鬼咁高興，點知唔夠５年就開始變，仲話50年不變，5年就變啦！」她說領匯上巿後，工人再無時間吃飯，「之前啲人指手畫腳，搭車見到我又鬧，去街巿買餸又鬧，咪由得佢鬧囉。𠵱家炮火連天，啲小商戶咪死囉，針唔拮到肉就唔知痛，𠵱家呢班人就瞓醒喇！街巿啲人同我講，早知聽你好啦，斬多啲豬肉你食，不過都補唔番。」
對於特首選舉，盧少蘭說：「我都無份選，畀我哋人人有一票，選個好人好事出嚟當家作主，唔好小圈子，大財團就理，小巿民就唔理。第日香港繁榮安定，我就死得眼閉喇！返閻王度都得，到時我就參加地下黨，唔喺呢度撈世界喇！」
已退下火線的盧少蘭，最大心願是爭取全民退休保障，希望人人有飯食，有屋住，「官司再打？唔打lu，我做頭炮已經打響咗個鑼，畀第二啲人做啦，我交棒畀佢哋。」
回歸10年倒數97日