喺大多數發達國家，平均工作時間似乎正在縮短，但隨着更多公司全日24小時營業，越來越多美國人要長時間工作，令空閒時間大減。聯合國國際勞工組織高級研究員梅辛杰話，大約五分之一美國人長時間工作，每周做50個鐘。
bunchargum喺《MSN討論區》話：「喺我認識嘅人之中，似乎越來越多人做兩份全職工作，或者做幾份兼職，每星期合共做60幾個鐘。隨着實質收入減少，美國中下階層人士如果一星期淨係做40小時，可能唔夠使，所以佢哋要做多份工。」
實質收入減 惟有加工時
Orbiter講：「照我所知，除咗教師之外，好少人一星期只做40個鐘，因為教師有漫長嘅暑假，全年平均工作時間較短。對於一般人嚟講，可能幾年前已經唔興每周工作40小時。除咗工時較長外，𠵱家唔少人放工後仲要進修，為自己增值，搞到成日都唔得閒。」
cschin4講：「有啲朋友生活好奢侈，譬如揸靚車，經常出國旅行等，所以要做兩份工，不過，我擔心佢哋長期都咁辛苦，可能頂唔順。」CRONEWITCH話，搵錢唔係一定要死做爛做，其他途徑（例如收租、投資、收利息）一樣可以賺錢。
Tokk認為，一個人如果精打細算，譬如趁公司大減價先至執平貨，咁樣一星期只工作30小時，可能已經夠。
賓夕凡尼亞州州立大學經濟學教授戈爾登講：「大多數美國人寧願延長工時，都唔願意縮減消費。不過，好多每星期只係返工40個鐘嘅人都話，由於要做家務、湊細路同購物，佢哋嘅空閒時間越嚟越少。」