肥龍誓神劈願捱夠兩年幾就收工，不過邊個接佢個位做CS好難講得掂數，加上煲呔話CS要壓得住場，特首行開行埋香港唔可以冇王管，環顧香港，邊個夠份量好易數得出。政府噚日登招聘廣告，唔係請CS，係請政務司司長官邸總管，順利請到人嘅話，相信最快都要幾個月後先返工，唔通大局已定，政府請定人服侍新CS？
要求高 人工奀
做CS官邸總管要求話高唔高，話低唔低，要識中、英文同普通話，仲要有五年喺大戶人家、高級酒店或者會所做主管經驗，兼且要輪班同喺山頂白加道官邸留宿候命，主要職責係打點家務、睇實官邸其他工人。肥龍𠵱家租住禮頓山，山頂官邸用嚟請客，官邸應該冇乜家務做，故總管另一職責係間唔中要外勤搞吓飲宴或官商名流聚會。
呢份工唔係鐵飯碗，合約為期兩年，月薪18,000蚊，表現好嘅話，約滿後會有總薪酬一成做約滿酬金。打開酒店工嘅老友話，𠵱家餐飲業幾好景，呢份工吸引力一般，勝在做完後份履歷夠「省鏡」，日後行走江湖時，叫做打過「高級政府工」，不過佢話如果𠵱家個總管想繼續撈，其他人好難爭，應該冇乜機會嘞。