自從二少檔now豪奪K寶用嚟鎮台嘅英超聯之後，大家都等住睇收費電視呢行會點樣整合。嗱！K寶10蚊睇一世呢招經已公告天下，至於其他兩個弱勢社群香港寬頻同無記嘅收費電視呢，前者基哥王維基已經表態話唔會「卸」二少，要繼續玩，仲不斷發掘新「藍海」，例如搞類似蘋果電腦嘅AppleTV；無記都有新消息，不過唔係還手，而係大隻陳陳錫年將會劈炮唔撈CEO。
究竟大隻陳做乜唔do、係咪調上母公司又或者完全撤出將軍澳工業邨？𠵱家未知，不過有口痕友話，無記收費電視多災多難，懷疑佢哋搞之前冇拜神！唔係咩？未開台股東就話退股，開台冇耐鬼佬CEO又走，幾經辛苦搵到殼王入去，再搵埋二少檔now做傳送拍檔……至於個寶號，由exTV改做SUN再改番做無綫收費電視，但搞咁多花臣，大家都只係隱約記得佢哋有條無綫經典劇集台，陰功！
邊個夠義氣頂呢個位
家陣大隻陳唔do，咩理由都好，華華都認為非戰之罪，試諗諗，K寶咁「厚底」，俾二少兩三下手勢就打謝，基哥使出藍海戰術都捱到嘔泡；至於無記，坦白講，求其唔使執笠都要還神，咁𠵱家二少繼續留響鰂魚涌打骰，落手落腳湊番個BB（佢最鍾意嘅now）。淨係睇呢個咁令人聞風喪膽嘅picture，大隻陳就算一個打得10個、比煲呔更用心打好份工都唔掂啦。唔知邊個夠義氣頂佢個位呢？