西環一直被視為老區，不少區外人認為西環多是茶餐廳、酒樓等簡陋又老土嘅食肆，出世至今一直居於西環的我，絕不否認呢度有時係舊係悶。但當你每晚見到食肆外排隊的人群、為了避人龍而搬走巴士站的工程，我差點以為自己去了銅鑼灣等旺區，起碼當我等位等足一粒鐘時，我真係有咁諗法！
記者：區佩嫦
攝影：楊錦文、林栢鈞
Model：Hidy&Willian
1.三上 街坊報警投訴
一直主攻深水埗、元朗等「平民區」的三上，早兩個月插旗西環，第一天試業爆場不特止，多達數十人的等候人群更因阻街而被街坊報警投訴，「可能我哋喺大街，每當多客人等位自然會封住成條行人路，𠵱家差唔多每個星期都有警察嚟，以前近門口仲有個巴士站，𠵱家連個站都搬遠咗，唔知係咪避咗我哋。」三上的行政總廚王偉笑稱。聽聞有街坊，每晚看見這種盛況，必定閃開，另行他路避一避的確誇張。
平民價賣一級貨
環顧此區，迴轉壽司店的確較少，加上該店貫徹薄利多銷的方針，壽司由$10起，最貴的珍寶帆立貝壽司亦只不過$40。選擇多亦是另一賣點，餐牌上展示了近百款壽司，還未包括大廚靈感到時炮製出的期間限定創作，難怪一開業除了受街坊歡迎外，不少港大學生還特地來幫襯。店分A、B兩舖，A舖主攻迴轉壽司，B舖則是料理店，內裏放上多張半開放式的卡座，還設有多間VIP房，帶點私竇Feel，啱晒一班年輕人開P或一家大小齊齊開飯。
排隊盛況
（上）飄香卷$20/3件
（下）蝦蝦霸霸$30/件
大廚最新的期間限定壽司，蝦蝦霸霸以巨型甜蝦配上迷你帶子，驟眼看恍如件西式糕點；飄香卷則是綴以芝士蟹子的三文魚卷，大廚話只要一放上迴轉帶，唔使一個圈，這些壽司已經消失得無影無蹤。
香芒珍寶帆立貝$78
在8吋闊的帆立貝上鋪雜菌、明太子沙律醬、芒果等烤焗而成，賣相吸引。帶點辣味的帆立貝鮮美且帶口感，清甜的芒果更能帶出海鮮的甜味！
三上盛$588
有拖羅、和牛、牡丹蝦、劍魚腩、油甘魚、海膽等10款刺身，入口鮮甜肥美，全為一級貨，並且每天由日本空運到港，價錢只不過是旺區的三分二。
街坊有嘢講
三上日本料理（28167722）
地址：西環卑路乍街26號A及B舖
營業時間：11:30am-11:30pm
人龍高峯期：6:45pm-9:30pm
2.加記 走遍山區農村搵食
開業已3年的加記，主攻農家及漁家菜，老闆鄭生為了保持食物溫度，特意訂做了附不銹鋼兜的木盆，配合店內陳設，極具農家風情。菜式不時轉換，鄭生經常到內地四出搵食，無論搭幾耐船再揸幾耐車，一定會去試試！
每逢假日晚上起碼做4轉生意，訂枱分6:00pm、7:15pm、8:30pm及10:00pm四個時段，依我個人經驗，若果唔訂枱，麻煩你坐在店前的櫈慢慢等，快則半個鐘，聽聞有客等咗兩個幾鐘，為了「平民美食」，等幾耐都值！
排隊盛況
咪走雞$88（須預訂）
該店的王牌菜式，以木盆盛載的咪走雞，選用兩斤半至兩斤十二両的新鮮靚雞，以古法醃製後鋪在糯米飯面蒸熟，最後灑上糯米酒。侍應端上枱時，酒香撲鼻，滲入雞汁的糯米飯更令你回味無窮！每日限量20份。
生財東坡肘子$88（須預訂）
選用約兩磅的新鮮豬手上莊，以秘製醬汁燜4小時，伴紅燒豆腐等，每日只售20份。
美果海鮮粒$58
以絲米粉紙代表芋頭等炸雀巢，巢內盛滿石斑、蝦仁、帶子粒，入口清甜爽口！
街坊有嘢講
加記（25408266）
地址：西環皇后大道西438號
營業時間：11am-3pm、6pm-12mn
人龍高峯期：7:00pm-8:00pm
3.德記 訂咗位都要等
要在潮州菜館林立的西區突圍，大件夾抵食可謂致勝之道。德記潮州菜館逢周末必定人頭湧湧，訂了位也要等15分鐘才可入座，「訂咗位都未必即刻有，𠵱家每晚只收一、兩張訂枱，由於好多都係老街坊，食完就會自動自覺走，所以正常嚟講即使唔訂位，等半個鐘至九個字就會有位！」老闆黃生稱。
這店逢星期一休息，方便老闆四圍試菜，更可讓員工休息，記住千祈唔好星期一嚟。連食肆都有休息日，夠寸！
排隊盛況
蝦棗拼墨魚卷$55
以新鮮中蝦而非急凍蝦來做蝦棗，每粒如乒乓波般，一咬入口，蝦的鮮味、馬蹄的爽，令你忍唔住掃清全碟！
蝦子八寶海參$68
單是浸發海參便需要4至5日，大廚將蝦子、帶子、瑤柱、海參等用上湯燴後再加蠔油芡，味濃。
潮式炒魚麵$42
用九棍魚、門鱔等打成魚麵，保留魚的鮮甜。
街坊有嘢講
德記潮州菜館（28195568）
地址：西環皇后大道西535號地下
營業時間：11:00am-3:00pm、5:30pm-11:00pm（逢星期一休息）
人龍高峯期：7:00pm-8:15pm