無綫深夜時段剛播映完關詠荷的舊作《陀槍師姐》，有網友認為當今TVB的新花旦，沒一個能及娥姐所擁有的觀眾緣，對此娥姐謙虛道：「觀眾對耐咗，可能有感情啩！以前我做新人嘅時候，啲人一樣覺得新不如舊，覺得發哥（周潤發）、梁朝偉同劉德華呢輩藝員好啲，觀眾會懷念佢哋，到我哋呢代又變成舊人，少咗見到你，可能就因為咁產生懷念之情，但唔代表𠵱家無綫呢一代小生花旦唔好，大家畀多啲時間佢哋啦！」
處境劇是底線
至於娥姐復出拍攝無綫的處境喜劇《同事三分親》，播出以來收視和口碑均不俗，難怪無綫一直游說她拍劇，不過為了丈夫女兒，娥姐難免要作出犧牲：「我諗拍呢個處境劇已經係我底線，𠵱家每晚最遲10點收廠返屋企，拍劇時間太長啦！又要日夜顛倒，我真係負擔唔起。」
即將退出娛圈
數年前，關詠荷經常到內地拍劇，因為酬金相當豐厚，但有了孩子後，她盡量不想出外工作，縱使一日也不想去，當香港藝人不斷返內地掘金，她卻無福消受：「返內地做嘢，錢係幾吸引，但拍一齣劇，短都要喺內地兩、三個月，我𠵱家要對個屋企負責任，個女咁細，做媽咪嘅，點可以成日唔喺個女身邊，戲癮更大都要放棄啦！我同老公已經有共識，再過兩年會追多個小朋友，到時我會全身退出娛樂圈，因為有兩個細路，責任更大，我一定要專心照顧佢哋。」
