有網民喺《Uwants討論區》搞咗個選舉，睇吓邊個發展商嘅樓最有信心保證，截至噚日下晝有153人次投票，每人最多投3票，結果83票去咗新鴻基地產（016）度，佔總票數54%，大熱勝出。至於甚少賣樓嘅太古地產就排第二，有25票（佔16%）。
早幾年開始，新地一直強調「以心建家」，起樓重質重量，成品又的確少見投訴，旗下好多屋苑喺唔少地區仲係樓價嘅指標，所以多年嚟累積唔少粉絲。
長凸花巧 信置玩包裝
發起今次投票活動嘅搞手Jackysiuwai亦話：「本人覺得新地及太古發展嘅物業質素最好。」
今次投票無既定準則，有人用間隔做標準、有人用質素，至於近年積極玩包裝嘅信和置業（083），都有11票；恒基地產（012）就只得9票。長期喺網上被「炳」嘅長江實業（001），都有7票。cf168認為，「以最花巧，最唔實用嚟講，長凸（實）第一。」講到實力，hondacrx就話：「梗係華懋實力最雄厚啦，起咁多低質爛樓，又無上市都屹立不倒，我覺得佢哋好掂。」話時話，睇返投票名單，冇華懋份。