香港現在有一個國際電影節，三百套戲播映五百場，有啲影迷直情請假一個星期，一日睇三場，左丁山無此時間睇戲，講吓都得嘅。呢晚到「東宮」食飯，聽宣傳Ｔ講戲，聽到津津有味。宣傳Ｔ為電影公司做宣傳二十年，日常宣傳海報、劇照、記者招待會、戲院「戲橋」，「觀眾反應熱烈」一類新聞鱔稿，全部一手包辦，一路做到間間電影公司都冇戲開拍為止。
宣傳Ｔ呢晚興趣甚濃，講「共同回憶」，佢話八十年代香港每年出產近三百套戲，每日都要宣傳一套新戲，佢哋幾乎包咗彌敦酒店頂樓嚟開記者招待會，一個下午開三場，每一場結束，就請啲娛樂版記者唔好走住，請演員離場，立即換過布景板，換過另一批演員出場，開第二場記招，呢啲盛況，現在冇晒咯，宣傳Ｔ變成白頭宮女說玄宗，年青記者唔知佢講乜。
懷舊當然要講埋女明星，宣傳Ｔ就好懷念昔日之玉女明星如林青霞、徐楓、李賽鳳等等。現在大牌女明星仍然係嗰幾位，玉女明星就唔會有乜接班人，俾大陸女星搶晒鏡頭。左丁山醒起，台灣《壹週刊》講首富定下擇偶條件，因為佢兩年幾前有喪妻之痛，現在心情回復，認為自己今年五十七歲，起碼仲有三十年壽命，生命點會冇第二春，所以決定搵結婚對象，唔怪得頻頻見佢喺娛樂版出現，同女星名模鬼咁親熱。
宣傳Ｔ話：「古老廣東話有一句，男人最大幸福係升官發財死老婆，三件事要順次序，台灣男人豈有不知之理……」此言一出，立即被女將圍攻，公關大姐大話佢侮辱女性，資深編輯話佢核突，宣傳Ｔ一於頂住：「喂，講吓啫，廣東話係有呢句話吖嗎，男人升官之後，發埋財，啱啱老婆唔見咗，你話男人有幾多新選擇呢！」有一百億身家，會有更多選擇，明星、玉女、名模，皆在入選名單呢，編劇Ｆ話：「唔使死老婆啩，離婚都得嘅啫。」咦，離婚？車路士班主話要賠十億英鎊畀糟糠妻喎，佢肉唔肉痛？不過，宣傳Ｔ能放能收，知道講笑話不可去得太盡，及時收口，免致俾在座嘅女士圍攻。