世事難料，你可能認為是陳腔濫調，但世上無事是無可能。有誰估到一心換屋治情傷，諗住可以平平靜靜過聖誕，點知換屋換上好運，匿埋屋內，足不出戶，都有靚仔祖廸羅（JudeLaw）送上門，加埋溫馨童話小屋，失戀都即時好番晒，呢個世界真係咩都有可能發生。
記者：馬靜兒
故仔講乜
Amanda（CameronDiaz）拋棄不忠的男友，Iris（KateWinslet）愛的人卻要跟別人訂婚，兩位女仔同時失戀。Amanda決定要放假出外休息，在網上找到Iris在英國的溫馨童話小屋，二人於是交換屋企過聖誕。Iris到陽光普照的南加州，暫住Amanda的豪華大屋，Amanda就到雪花紛飛的英國小鎮，躲進Iris溫暖的童話小屋。二人本來希望可以出外唞唞氣。結果，兩個星期的不一樣假期，Amanda遇上送上門的Graham（JudeLaw），Iris則跟Miles（JackBlack）相戀。假期變了愛情精華遊。
愛情式小品最貼心
愛情小品無論如何都一定獲得不少女仔歡心，講失戀，話題夠貼心。兩位女主角都無以前咁靚，額頭皺紋都出晒。金美侖殘了，琦溫的艷光也蕩然無存。雖然如此，沒有影響這齣戲的可觀性。始終女仔睇愛情故事，仲要加個靚仔「豬囉」，點都會加分啦！仲要講祖廸羅半夜搵細妹搵上門，咁就識咗喇。
換屋住=換情人
好記得金美侖被男友投訴帶埋工作返屋企，仲要晚晚攬住BlackBerry瞓，結果男友搭上公司的女同事，分手收場。此等情況其實好多人都遇上，結果點？正如金美侖在戲中說，女人在嚴重壓力下（無論是工作或愛情），DNA會收縮，細胞不能複製，結果會衰老。嘩！咁大件事，難怪要玩換屋，換吓環境。
曾經有人話過：正常生活好鬼乏味！無錯，好似祖廸羅在戲中平日要盡心照顧女兒，壓力好大，放假就去飲酒飲到天昏地暗。無辦法改變生活，惟有找尋短暫刺激，才能支持下去。不過，短暫換屋換生活環境，至少有新鮮感。
老土得嚟 好SWEET
論劇情，除了上網換屋有點新意，其他情節真的有點老土。如金美侖和祖廸羅擔心分隔兩地最終會分手收場，雙方依依不捨。不過，老土一樣OK！金美侖一段戀情較賞心悅目，可能因為祖廸羅靚仔，劇情仲要安排佢自動送上門喎！真係咩事都有可能發生，個個香港女仔都恨死！
琦溫那段故事明顯無金美侖的吸引，始終覺得琦溫跟同是失戀的JackBlack投緣，老土得來都好sweet。
全場睇靚屋靚景
第一樣吸引人的不是兩位女主角，反而是金美侖和琦溫兩間屋。一間是豪華大宅，有花園有泳池，似足度假的Villa。張開兩隻手都唔夠佢大的電視，用唔晒的影音器材，完全有一夜致富的感覺啦。另一間又像極童話世界的小屋，雖然細細哋，但勝在夠溫馨。連屋的外觀都似足細個睇童話故事書內的小屋。女仔未睇故事淨睇屋都已經開心。
金美侖匿埋童話小屋
後記：可惜冇BonusTrack
今次禮盒裝都無BONUSTRACK，得PASSPORT套，無理由唔買普通裝啫！不過，片長兩個多小時，中間真的有悶場，出DVD時其實可以剪短少少。至少可以省回時間，等失戀的人可以上網搵吓有無屋可以掉換嘛！豪宅或者童話小屋都無問題㗎！
《緣份精華遊》
片長：138分鐘
DVD禮盒裝價：$138
DVD價：$128
ERA（27873612）
