劉嘉玲近排因為捲入梁朝偉與台灣首富郭台銘嘅三角愛情漩渦，成為新聞人物，而自從郭台銘話對嘉玲係認真之後，嘉玲一直冇就呢番話發表過講話，而且佢雖然係偉仔嘅女朋友，但一樣冇避忌咁成日同郭首富公開拖手，又陪對方去旅行，證明佢並唔抗拒對方嘅追求，郭生早排仲發表聲明話同嘉玲交往唔涉及金錢。
晒右手無名指鑽戒
其實呢排嘉玲同媽咪一直喺蘇州為新居搞裝修嘅事，前日佢喺合肥出席浪琴錶宣傳活動，今次係郭台銘發表對嘉玲認真嘅宣言後，嘉玲首度公開露面，綜合內地互聯網報道，嘉玲右手無名指戴咗一隻鑽石戒指，當記者追問佢情歸何處時，嘉玲對所有感情問題一律唔答，只係話：「作為一個不同尋常的女人，自信是很重要，我並不在意別人去說甚麼！」始終唔肯正面講三角戀一事，睇嚟連佢自己都未揀定，如果唔係，佢唔使避啦！
馮仁昭覺得嘉玲咁做，偉仔係冇面至極，照理佢如果同郭生冇乜特別關係，冇理由唔維護男友尊嚴，斷然交代清楚同郭生嘅關係呢！
