薛凱琪神聖天使翼
「其實我一向覺得天使翼好神聖同好靚，令人有一種好自由同好有希望嘅感覺，我之前影CD封套個主題係girlwithwings，本來諗住喺背後加對翼，但韓國嘅阿Rain做咗，所以取消呢個idea，後來話不如戴唔同嘅天使翼飾物上身，所以最近我就買咗好多天使翼嘅飾物。
李蕙敏巨戒襯身高
「隻戒指幾個月前喺老連（連卡佛）買㗎！係一個外國設計師嘅作品，我貪佢夠大又夠閃，我最鍾意大大款嘅飾物，連手錶最好襯埋大大隻，可能因為我身材高，覺得咁樣易襯衫又突出到件飾物，最重要係可以吸引到人望自己對手嘛！通常比較誇張款式嘅戒指就最合我心意。」
官恩娜型女皮手套
「呢對皮手套係我同事幫我買嘅，我覺得好得意，襯上身都好有型，雖然我着短裙比較女仔feel，但係戴住都覺得女人味之中都略有型格，雖然唔可以當保護咁用，但都可以當飾物咁去配搭，簡單得嚟又唔太平凡。」
袁彩雲白淨鑽石鏈
「呢條鏈係我出席一個活動時，大會送畀我嘅禮物，我覺得呢個款比較casual，平時出席一啲唔係咁隆重嘅活動都好易襯到衫。至於揀鑽石方面，好多人都認為大粒就係好，反而我比較注重粒石夠唔夠白，同夠唔夠閃，如果粒石好大粒，但係唔夠白淨都唔靚。」
採訪、攝影：胡比、魯萍、王崇穎
