中華網（8006）手頭揸住嘅現金連投資，相等於現價80%，買入呢隻超級現金牛，博兩個可能。中華網上年年尾出售網上遊戲業務畀阿媽CDC，最高代價10.5億港銀，首期以現金及票據支付。中華網家陣現金連應收票據，講緊11.5億銀，加埋可供出售投資，高達18.7億銀。呢筆數額，相等於每股0.427元，係股價（0.53元）嘅80%，誇張到爆。
要咁睇，阿媽CDC購入中華網網上遊戲業，花費唔少，中華網受惠業務出售勁賺，又會唔會派大息，回饋各「大」、小股東？又中華網年幾以嚟，股價壓到實一實，街貨市值5.3億銀咁大把，只係相等於集團現金、票據及投資總值嘅28%，中華網現價翻一番到1蚊樓上，亦不過係現金及投資總值之56%，中華網有私有化誘因。當然，仲有第3個可能，就係管理層惜金，但3個可能中，兩個係chance面，抵博。
大同機械短炒博兩成
大同機械（118）係冷冷哋嘅工業股，但現價（0.58元）NAV折讓45%，相對同類股震雄（057）及其他已經炒到唔炒嘅國企機械工業股吸引。
又大同06年度中期（6月止），喺原料價狂升嘅惡劣環境下，仲有近20%純利增長，去到2233萬銀，相當唔話得。估計大同06年度純利，係咁易增長10%到6000萬銀，PE都係6倍單位數。呢轉冷敲大同，短打博見0.7元，潛在回報率22%，已經有魚有肉。