一般嚟講，上市公司開股東會，攞股東批准授權董事局發兩成新股，都唔會有咩問題，即使係金融界長毛DavidWebb年年呼籲，成效都唔大，近年只見過東亞銀行（023）曾經被推翻呢個例牌嘅動議。不過，上個禮拜五「意外」出現喺一隻蚊型股身上，呢間就係電力公主李小琳準備透過注入上海風力發電項目而增持11%股權嘅東成控股（735）。
點解話「意外」呢？原因係投票結果，東成嘅大股東係廣州市前市長黎子流個仔黎亮，同埋雨潤食品（1068）主席祝義才各揸一半嘅WealthSuccess，佢哋嘅持股量係34%。雖然佢哋唔投得票，但照計香港小股東好少反對，呢種發新股嘅授權議案一般都過硬，只要好少「自己友」就可以搞掂。
東成當日投贊成票嘅只有106.6萬股，但居然有1100萬股反對，以東成32.21億股票計，無論贊成抑或反對都只係好少數，但居然咁少票就推翻咗個議案。
見過鬼怕黑
究竟點解會咁呢？華華聽聞，可能係李公主05年俾中國環保電力（290）主席「Ba叔」陳達志同埋中科環保電力（351）主席韓明光跣咗一鑊，最後搞到要即時「果斷」取消入股中科環保有關。
東成今次將股東舉手通過買公主嗰個風力發電項目，同埋一般授權議案，分開兩次股東會處理。授權議案上周五開，買風力項目4月2號先開。𠵱家已經揸住東成10%（3.25億股）嘅第二大股東李公主，唔知對方搞咩嘢。為免又要「果斷」行事，可能因此動用佢自己一啲股票反對授權，其實咁都好正常啫！
[email protected]