中糧控股（606）招股上市，有成40幾萬人申請認購，超額606倍，同股票編號一樣；唔少抽唔到嘅網友，都諗住上市首日追貨。
應高沽候低買番
T12就因為抽唔到中糧新股，喺《香港高登討論區》話要出公海撈貨，仲諗住炒即日鮮，「今朝（上周三首日上市）喺5.65元嘅價入咗5手中糧，睇吓有冇機會搵餐晚飯食吓。」抽到1手仲未放嘅千里追魂就話：「應該唔止搵到餐普通晚飯咁簡單，仲可以食好啲，鋸扒甚至食高級日本菜可能都得。」
可惜，隻中糧唔係咁生性，股價由高位不斷咁回，收報5.53；雖然較招股價仍有近五成升幅，但T12由於喺高位入貨，股價跌近2%；未計手續費，賬面損失6舊水，晚餐冇着落。
網友061205見到咁嘅情況，就勉勵幾句：「轉揸長線啦！等下一年新年食餐更勁嘅，魚翅『浪浪』口！」真係男人就話：「都唔係損失好多啫，當上堂交學費囉！」
9B就覺得T12唔係買錯，係入貨時機錯咗，「通常保薦人喺首日都會將個股價推高啲，禮成後就鬆人；有貨嘅話，首日高位沽咗，吼低位買番仲化算，唔使咁心急買，銀泰（1833）同三林（3938）都有辦畀你睇喇。」
近期第3日先發力
另邊廂喺《Yahoo討論區》，Bennyhkt就覺得隻中糧嘅走勢會同中交建設（1800）好似，「中交建一上巿就連跌兩日，到第3日先跌後回升，之後就爆上。所以第3日好關鍵，要昅實啲喇。」印證股價圖，Bennyhkt又講得幾準喎。