地政總署除咗賣地之外，間唔中都會有啲散單位放售，由於唔少係舊樓，兼單位面積細，所以少人留意，啱晒區內嘅投資者。最近地政總署又有一批政府物業標售，今個禮拜四截標。
華華上網睇過招標章程，發現其中有一項竟然係一個蚊型舖，認真少見，個舖喺深水埗大埔道置輝閣地下4A號，有幾大？約莫只得2.5方米，即係26.9呎囉，睇怕貴極有限。不過，華華最有興趣想知嘅係，地政總署點解會揸住個咁嘅蚊型舖，有乜租客租過嚟用？
舖位係人流越旺越值錢同值租，睇吓銅鑼灣景隆街2A號舖，面積約100呎，月租可以去到18萬，賣價10萬8萬蚊一呎肯定冇走雞。呢個置輝閣舖仔肯定差成條街，根本冇得比。
招標章程又話個舖連同北角和富中心3座14樓B室，同荃灣榮興工業大廈5樓9號室一齊標售，但係買家若一次過投標3項物業，就要每項交一份標書；當然，買家都可以單投其中一項嘅。但政府點解有咁嘅安排？認真難明！