前幾天不斷有朋友在耳邊吟吟噚噚話《戰狼300》點好睇點勁，呢個情形並不經常發生，因為每逢有好睇或應該睇嘅西片上映，我都會搶先入院觀看，然後在朋友耳邊吟吟噚噚，話邊套戲點好睇點勁，竟然被朋友搶了先機干擾我的入場觀影感受，始料不及。
唔怪得我後知後覺，《戰》片既沒有幕前大卡士，也缺乏幕後大孖沙，只有原著的漫畫家FrankMiller最大名，觀眾如何得知呢齣係好嘢，真要好好研究一番。
故事講述古時代溫泉關戰役，斯巴達國王率領300名勇士拚死對抗千萬波斯大軍，情節並不新穎，但勝在有新嘢睇，拍攝方式像年前的《罪惡城》，大部份背景利用電腦特技合成，所以畫面要幾唯美有幾唯美，美得像聖經故事中的插畫，斯巴達國內又個個靚仔靚女Model一樣，勇士們通通只穿真皮T-back小袴，肌肉一嚿嚿行嚟行去，張達明話齋，未睇過一齣戲有咁多腹肌，記得徐克導演的舊作《刀》也有同樣陽剛氣，同樣肌肉一嚿嚿，但人數則少得多矣。
又教我想起另一齣港產片《打擂台》當年所用的標語：「肌肉成為永恒，強權就是公理」，《戰》片除了唯美，便是痛快，斯巴達勇士們手起刀落，將敵人斬瓜切菜，手手腳腳頭被斬到滿天飛。今時今日就算拍戰爭片斬殺敵人時都要講究政治正不正確，對方縱是敵人，好歹也是一條生命，惻隱之心，人皆有之，但在《戰》片內，人人斬嚟斬去，睬你都儍，更有一幕是大家一邊傾閒偈一邊為躺在地上死咗一半死唔去的補上一刀，FrankMiller的漫畫世界向來彌漫的便是這兩個字──痛快。