上星期睇國際新聞，知道可可豆主要生產國科特廸瓦因旱災失收，而第2大生產國加納情況更差，令紐約及倫敦可可豆商品價格急升至4年高位，上周五收報每噸1920美元，較去年12月低位1456美元，大升31%。
西非係可可主要生產國集中地，該等地區持續亁旱，不但使幼嫩的可可樹枯死，更減少其他可可樹產量，科特廸瓦農民形容旱情是有生以來最嚴重的。除了供應緊張之外，可可需求亦見持續上升，由於可可豆含有天然防氧化劑，稱為黃烷醇，很多研究報告指出，黃烷醇有助預防血管病如心臟病、中風、糖尿病、癡呆症和高血壓症。
因此要用較多份量可可的純種朱古力，近年在歐美更受市場歡迎，造成可可豆市場供不應求，短缺估計達10萬至25萬噸，朱古力食家便會留意到，朱古力近年越賣越貴。
香港唯一有做可可豆生意嘅係環新國際（502），係全球第3大可可豆生產國印尼嘅出口兼貿易商，由於旱災出現於西非而唔係東南亞，印尼間接得益。最近環新已不單滿足於只係供應可可豆，正全力進軍可可豆加工業務，在新加坡投資建廠，有利毛利進一步增加。呢隻冷門股仔，要昅實。
金匡再賣物業套現
由細細劉打骰嘅金匡（286）上周於買賣中途突然停牌，上周五晚睇到通告，原來涉及向第三方出售物業，呢項物業係位於葵涌嘅中僑貨倉大廈，而除咗之前訂立買賣協議嘅物業外，上述物業為該公司擁有之餘下物業，即係完成呢項交易後賣晒。大劉之前其實已用咗超過1年時間執靚金匡個殼，等細細劉大展拳腳，呢次賣物業套現後，正式進入搵筍嘢買嘅最後階段，雖然通告話未物色好嘅收購對象，但只係時間問題，今日復牌可以睇位短炒。
歐陽風