中國未來4年舉辦多個大項目，包括奧運同世博等，香港中旅（308）係旅遊業龍頭，食正呢個大浪，無論係短中長線，都係上佳嘅投機同投資對象，要買。
今年1月中推介中旅，當時股價2.45元，話坐三望四無問題，基金更信心爆棚，睇5元。1個月多啲（上月22日），中旅已超額完成目標，上到4.17元，調整個多月，上周五收3.38元，有貨在手者，可加碼；已獲利回吐或冇貨者，可上車，今次目標係基金所睇嘅5元，預計升幅有48%！
中旅同母公司今年會有連串大動作，單單都係好消息：
1.奧運倒數已進入500日，兩間大行（高盛同瑞銀）都指奧運概念係今年投資主題，中旅有絕大機會取得奧運門券總代理權，最快下月開售，到時肯定會掀起熱潮，賣個滿堂紅，股價亦會「㷫烚烚」。
業務重整將展開
2.內地去年全年旅遊產業收入達8940億元人民幣，破晒紀錄，今年仲勁，預計會衝破1萬億元大關；內地旅遊達15億人次，升8%；出境旅遊3740萬人次，升10%。明年奧運年，增長仲勁，中旅係龍頭，受惠亦最大。
3.中國今年將會出現旅遊業最大的一次合併，就係中旅（第3代）的母公司香港中旅集團（第2代）「反併」第1代的中旅集團，有關程序已完成，好快會公布，而中旅的重整亦會展開，預期會注入北京多間酒店及招商國旅業務（食正奧運概念），以及出售渭河電廠，集中發展高增長及高回報的旅遊業務。
4.去年3月啓用的芒果網，正安排分拆上市，集資再進行併購擴展，芒果網現時已與3500多間中港澳酒店建立合作關係，係全國第3大旅遊網，3大之一的「攜程」早年上市，股價大升，芒果網一分拆，中旅股價又添新動力。
中旅股價已重上4條平均線之上，今日再發力，MACD亦會出現雙牛入貨訊號，中期升勢確認。
提多句，留意華基光電（155），上周五一支大陽燭抽上，衝破0.79元就證實新升浪，初步目標係0.93元。
郭兆誠