女性近年無論喺學校定辦公室，表現似乎已趕過男性，但現今社會，就算你係美女、才女都仲未夠，想做一個獨立自主嘅現代女性，你仲要係「財女」──高財經智商嘅女性，不單止要識得賺錢，仲要識得理財、學會投資，為自己計劃一個安全美好嘅未來。
有網友就喺《中金在線》向一眾OL傳授理財錦囊，指出佢哋經常犯嘅5大致命傷。希望可以消除佢哋對理財嘅誤會，將自己修煉成一個新世代財女，喺理財上都可以迎頭趕上男人。
【誤會1】只會存錢喺銀行
有調查顯示，一般女性最常使用嘅投資工具係儲蓄同保險。咁樣嘅投資習慣，可見女性尋求資金安全感，卻忽略通脹呢個無形殺手，不單蝕息，長遠計可能蝕埋老本。
【誤會2】攞會員卡慳多啲
女人對各種會員卡、折扣卡可謂情有獨鍾。好多情況下碌卡消費確實慳錢，但有時用卡不單止慳唔到錢，仲會適得其反。大部份商舖規定消費一定數額先至攞到會員資格，如果單係為咗攞卡而買多咗嘢，就一定慳唔到錢。
【誤會3】自己賺不如嫁得好
有啲女性將未來寄託於搵個有錢老公，反而忽視咗提高個人創造、積累財富能力；有啲就凡事依賴老公，認為養家係男人天經地義嘅責任，自己只要管好頭家就得。妄想通過婚姻嚟解決經濟問題，假如婚姻唔穩定，不單止會令你失去金錢，仲會令你失去愛情。
【誤會4】跟大隊冇走雞
大多數女性都會跟隨親朋好友做埋一樣嘅投資，好多時會忽略咗自己嘅財務需求，唔適當嘅理財模式，反而會造成財務危機。
【誤會5】以為慳仲使凸
女性大多有購物嗜好同衝動，呢個亦係導致許多女性個人理財失敗嘅重要原因。點樣控制購買慾？喺買嘢嘅時候，先慎重考慮自己目前係咪真係需要呢樣嘢，即使價錢減咗好多、好抵買。
MAYCHAN亦趁熱鬧分享個人經驗，佢話：「我每個月會訂定收支紀錄，按月定額供股票同基金；出街時，身上唔會帶過多現金同信用卡，以免一時衝動亂花錢。」