原本話喺今個月中舉行嘅森那美名車博覽中現身嘅全新LandRoverFreelander2，因船期問題而改喺上星期於灣仔Showroom現身，除咗吸引到一班傳媒到場採訪之外，就連靚女蒙嘉慧都到場力撐新車！
記者、攝影：鄭達基
小朋友講試車感受
喺當日嘅新車發布會中，除靚女蒙嘉慧到場出席，並表示部車好啱自己外，大會更安排咗位Freelander2嘅Fans接受訪問，咁呢位Fans究竟係邊個呢？哦，原來係一位小朋友，佢可以話係首位「試車」嘅車迷；佢除咗讚部車個樣夠靚之外，坐落仲好舒服。諗落代理今次咁做，無非都係想搞吓噱頭，話畀大家聽大人細路都鍾意呢部新車啫！
講番部車，全新Freelander2除咗有一個比舊款更Grand、更具剛陽味嘅造型之外，車廂空間亦見闊落，仲有天幕式車頂設計，從而令享受程度更上一層樓。機械配搭則以一台3.2直6引擎作核心，馬力輸出達233匹，性能表現毋庸置疑；車價則大約係43萬左右，咁就真係難怪班Fans喺車未到之前，已經話爭住落定同埋要試車囉！