有觀眾緣、有愛惜自己的老公、有可愛的囡囡，事業、愛情和家庭，人生的所有，關詠荷都擁有。不過世事豈能盡如人意，關詠荷一生中最痛，是她一直三緘其口、大家都不知道的04年小產事件，如今事過境遷，她希望講出這件事後，能鼓勵一眾同病相憐的姊妹，不要因為一次失敗而退縮。幸福不是必然，重要的是如何抓住幸福。 撰文：陳月媚
勇敢面對傷疤
關詠荷和丈夫張家輝17年前在亞視認識、拍拖，於03年結婚，婚後一直希望擁有屬於他們的愛情結晶品，06年1月囡囡Brittany出生，之前關詠荷宣布夢熊有兆後，兩夫妻立即將手頭上所有工作停頓下來，如此緊張，原來是因為04年他倆已經遭逢過一次沉痛的打擊──胎兒不幸夭折了。
發揮娥姐本色
《陀槍師姐》中娥姐的性格，正是現實中關詠荷的寫照，單純、爽朗得來又不失嬌媚，面對挫折拿得出勇氣。日前關詠荷在西貢一間餐廳接受本報專訪，終於可以面對過去，平靜地憶述這個藏在心底3年的不快經歷，將自己已癒合的傷口展露人前，是因為她深知道有些女人經歷流產後，留下很深陰影，害怕再懷孕，她想傳達一個訊息，就是失去了一次，不代表永遠失去，應該拿出勇氣再踏前一步。關詠荷歎息道：「老實講，發生呢啲事，有邊個父母唔難過，但唔可以因為咁就冇勇氣去面對。」
04年兩夫妻互相扶持，度過了人生最艱難時刻，關詠荷細訴道：「當時我知道有咗兩個月身孕時，我同老公真係好開心，因為我哋恨有BB好耐，為咗安胎，我停晒所有工作，家輝就諗住喺上海拍完部戲就會返嚟香港陪我分娩，諗唔到幾個禮拜後有啲唔舒服去檢查，醫生話我流產，聽到呢個消息，我哋嘅感覺好似天塌咗落嚟，傷心到喊唔出！」
家輝哭了整晚
關詠荷將這個噩耗告知當時正身在上海的家輝，雖知道他一定受不了，但最後仍選擇將實情告知，關詠荷說：「老公知道後，係咁問點解？一直喺電話度喊，佢好擔心我，想即刻飛返嚟陪我，但我知道佢忙緊幫部戲埋尾，我唔想影響佢嘅工作，勸佢唔使擔心，家姐會照顧我，叫佢安心拍完部戲先返嚟！」家輝哪裏會安心？收到噩耗的晚上，他在酒店哭了一整晚，明知這個時候娥姐最需要他在身邊安慰，自己卻身在異地，心裏既內疚又難受。
用了不少時間面對現實，關詠荷和家輝才慢慢回復過來，她聽醫生吩咐好好調理身體。05年初她再度懷孕，這次不容有失，一切都聽從醫生指示去做，畢竟是高齡產婦，頭三個月是關鍵時期，關詠荷說：「上次小產，醫生話可能因為我之前長期勞累，身子負荷唔到，所以要我先養好個身體先再生BB，咁我就好聽話停晒啲工作，差唔多一年我就再有BB，家輝同我都好興奮，佢仲緊張到推晒啲工作陪住我，當睇到個女健健康康咁嚟到呢個世界，嗰種喜悅非筆墨可以形容！如果我因為失敗唔敢再去試，又點會換來今日嘅結果呢？」
訓練女兒獨睡
為了好好養育女兒Brittany，關詠荷看了很多有關的書籍和諮詢專家的意見。為了培養囡囡要獨立，Brittany僅得10個月大便要獨睡，聽起來頗殘忍，關詠荷對此解釋：「專家話咁樣可以培養佢嘅獨立性，雖然二樓只得個女一個人瞓，我同老公喺三樓瞓，但我哋喺佢房校咗一個感應器接駁到我哋間房，只要佢醒咗，我哋即刻落樓睇佢，分房瞓嘅初期，佢唔適應係咁喊，我同老公都有啲唔忍心，但導師話要忍。幾個禮拜後，𠵱家個女自己瞓已經冇問題，不過近排我返咗無綫拍劇，個女三更半夜醒咗，老公唔想我咁辛苦，佢會自動自覺落樓陪個女，等佢瞓咗先會返上床，佢呢輪要父兼母職，真係辛苦晒佢！」
家輝日前曾吐苦水，後悔同意讓太太重返無綫演出長達半年的劇集《同事三分親》，因為近期照顧女兒的責任幾乎全落在他身上，關詠荷帶點歉疚說：「初時我同佢都冇諗過會咁困身，可能因為開劇初期比較混亂，時間唔係咁定，我冇放過一日假，佢就盡量幫我湊個女，等個劇拍順咗，我諗可以有多番啲時間睇個女。」
攝影：陳偉權
場地提供：光明頂
