早前有報道指韓國小天后BoA有機會與周杰倫合作，演出改編自日本人氣漫畫《男兒當入樽》（SlamDunk）的新片《灌籃》，可惜最後都係由蔡卓妍出任女主角。呢本漫畫喺韓國都好受歡迎，所以最近當地有網友嚴選韓版《灌籃》嘅演出人物，其中主角櫻木花道就搵咗同樣高大威猛嘅趙寅成扮演。
蘇志燮欠神髓
趙寅成鏟咗平頭裝後，的確有幾分似櫻木，所以唔少網友都舉腳認同。至於另一主角流川楓就建議由蘇志燮演出，不過阿Net覺得蘇志燮除咗對眼有少少似之外，根本冇流川嘅神髓，而且最重要係欠缺鋼條身形。
其餘湘北高中籃球隊隊員人選中，型男鄭雨盛、張赫同車承元都有份，但以「俊哥」裴勇俊擔任嘅木暮公延副隊長較神似，可能係因為兩位都經常戴金絲眼鏡。
阿Net覺得韓國網友真係好認真，除咗配對湘北籃球隊外，陵南、翔陽同豐玉高中嘅隊友都有配對，所以有口痕友話如果真係拍成真人版電影的話，必定大收旺場。
網址： http://blog.naver.com/zizitory?Redirect=Log&logNo=90015500298
版主：阿Net
本欄逢周一至六刊出