女人有誰不愛美，包裝得貴氣華麗嘅化妝品，女人十居其九都鍾意，有邊個冇發過夢，想做個魔鏡讚自己係最靚嘅小公主、大女皇。計我話，要靚就要由內而外，一白遮三醜，美白最緊要，就要多食維他命C，食當造士多啤梨就啱晒。所以今日就帶大家先去粉嶺任摘草莓，食到白裏透紅，再去99.9純金宮殿做皇后。各位公主𠵱家就實行帶備王子，整裝出發，咪嘥咗日DayOff！
記者︰劉昱蘭
攝影︰楊錦文
Model︰Yan、Lilian（IG綜藝社群）
鳴謝︰發達旅遊
打鼓嶺草莓全港最靚
要摘士多啤梨就真係要快啲趕「造尾」，佢哋嘅當造期係每年嘅12月至4月，𠵱家計都仲有1個月時間玩吓，依然可以見到滿園點紅片綠，未行到入草莓園，已經聞到陣陣果香，記者開工未食早餐，個肚即刻打鼓。不過果園嘅技術顧問王先生話我遲到，遲咗1個月嚟採訪，嗰時仲靚喎，每年1、2月，隨手摘1粒，都大到好似乒乓球咁，脹卜卜、紅噹噹，好誇張。3、4月多雨，如果唔介意味淡，剛下雨後採摘都無問題；但如果想甜美啲，等吓太陽出嚟曬一曬先落手就好啲，因為草莓水份被蒸發，先係最滋味。
雖然錯過佳期，但王生話果園地點一定係全港最好，最甜美嘅草莓要種喺日夜溫差大嘅地方，大家冬天聽天氣報告，都成日聽到打鼓嶺凍到結霜，所以喺香港嚟講，呢度嘅溫差對草莓最好。潮流興有機種植，個個果園都聲稱自己Organic，我實地觀察過，葉無白點，同埋我俾蚊Kiss咗幾啖，證實佢無講大話。
點樣摘到最靚草莓？
王生種士多啤梨超過10年，佢話識摘的話，草莓可以Keep一個星期都得。
觀光士多啤梨園
地址︰粉嶺打鼓嶺李屋新村嶺坪輋坭路
電話︰26746198
純金宮殿做一日公主
放眼遠望盡是黃金，再唔係宮廷級數嘅白日夢，土瓜灣都已經有一個99.9純金歐洲黃金宮殿，鋪天蓋地加埋有2.5噸、市值約5億元嘅純金，喺7,000呎皇宮360度望一個圈，只係見到一隻色包圍住自己。望到金床、梳妝枱、金廁所、食飯枱……好似返咗屋企咁，如果我一夜發達咁富貴就好喇。
瑞士號黃金宮殿
地址︰土瓜灣炮仗街71-77號
查詢︰27600707
開放時間︰9:00am-5:00pm
入場費︰$25/位
豪氣食酒店自助餐
今日大家公主出巡，要配合身份，醫肚梗係要去富豪九龍酒店食Buffet喇。呢個2餐團絕對好服侍，酒店午餐後仲有象拔蚌鮑魚海鮮晚餐，保證食得豪。
報團資料
發達旅遊——酒店自助餐及海鮮餐2餐團
主要行程︰
隋唐南蓮園池、99.9純金歐洲黃金宮殿、尖東富豪酒店自助午餐、士多啤梨園、空中佛殿、流浮山象拔蚌鮑魚海鮮餐
團費︰$188/位（不包括$20領隊費。另復活節假期出發，每位加$10）
優惠︰3月31日前報名復活節（5/4-9/4出發，若4人同行，每位減$15元（不可與其他優惠同時用）。
出發日期：4月1、5-9、15、21、22、29日及5月1、5、6、13日
查詢電話︰23950788
報團地址︰旺角雅蘭中心一期1615室
